चिपळूण :
तनाळी-राधाकृष्णवाडी येथील विहिरीत पडलेल्या बिबट्याला वनविभागाच्या बचाव पथकाने रविवारी सुखरुप बाहेर काढून नैसर्गिक अधिवासात सोडून दिले.
तनाळी-राधाकृष्णवाडी येथील सहदेव बाईत यांचे घरामागील विहिरीत सकाळी ९ वा. बिबट्या पडल्याचे सनवी बाईत यांना दिसले. त्यांनी याची माहिती पोलीस पाटील राजेश थरवळ यांना दिली. त्यांनी वनविभागाला कळविले. त्यानुसार वनपरिमंडळ अधिकारी एस. एस. सावंत, फिरते पथक चिपळूणचे वनपरिमंडळ अधिकारी जी. एम. पाटील, वनरक्षक दत्ताराम सुर्वे, रामपूरचे वनरक्षक राहुल गुंठे, वनरक्षक अनंत मंत्रे, वाहनचालक नंदकुमार कदम, संजय अंबोकर हे बचाव पथकाची सामग्री व आधुनिक पिंजऱ्यासह घटनास्थळी दाखल झाले. त्यानंतर विहिरीत पडलेल्या बिबट्यास अर्धा तासाच्या प्रयत्नानंतर ग्रामस्थांच्या मदतीने सुखरुप बाहेर काढले.
विहिरीमधून बाहेर काढल्यावर बिबट्याची पशुवैद्यकीय अधिकारी डॉ. कणसे यांनी पाहणी करून तो सुस्थितीत असल्याची खात्री केली. हा बिबट्या मादी जातीचा असून त्याचे अंदाजे वय दोन ते अडीच वर्षे आहे. त्याला सहाय्यक वनसंरक्षक प्रियंका लगड यांच्या उपस्थितीत नैसर्गिक अधिवासात सोडण्यात आले. बचाव पथकाला विभागीय वनाधिकारी गिरिजा देसाई, सहाय्यक वनसंरक्षक लगड, वनपरिक्षेत्र अधिकारी एस. एस. खान यांचे मार्गदर्शन लाभले.
