सिव्हील हॉस्पिटलमधील ओपीडीसमोरील विभागाला गळती

बेळगाव : जिल्ह्यातील गोरगरीब जनतेचे रुग्णालय म्हणून सिव्हील हॉस्पिटलकडे पाहिले जाते. मात्र तेथील समस्या अद्यापी जैसे थे आहेत. ओपीडीसमोरील विभागाला गळती लागली असल्याने त्यावर ताडपत्री झाकण्यात आली आहे. त्यामुळे रुग्ण आणि नातेवाईकांना गळक्या खोलीत राहण्याची वेळ आली आहे. सिव्हीलमध्ये उपचार घेण्यासाठी येणाऱ्या रुग्णांची संख्या मोठी आहे. दररोज बाह्य व अॅडमिट होणारे रुग्ण सातत्याने येत असतात. अलिकडेच सुपरस्पेशालिटी हॉस्पिटल उभारले आहे. मात्र जुन्याच इमारतीत अद्यापही बहुतांश विभाग सुरू आहेत. कांही मोजकेच विभाग नवीन इमारतीत सुरू केले आहेत. दरवर्षी पावसाळ्यात जुन्या इमारतीत पाणी झिरपत असल्याने याचा फटका रुग्ण आणि नातेवाईकांना बसत आहे. स्लॅबमधून पाणी झिरपत असल्याने काही ठिकाणी पत्रे घालण्यात आले आहेत. ज्या ठिकाणी पत्रे नाहीत तेथून पुन्हा पावसाचे पाणी सिव्हीलमध्ये येत असल्याने पर्यायी व्यवस्था म्हणून ताडपत्री घालण्यात आली आहे. ज्या ठिकाणी गळती लागली आहे तेथील विभाग नवीन इमारतीत हलविण्यात यावे, अशी मागणी करण्यात येत आहे.