गोवा वेल्हा चामुंडा देवीचा 22 रोजी लालखी उत्सव

पणजी : तिसवाडी तालुक्यातील थोरले गोवे (गोवा वेल्हा) येथील श्री चामुंडा देवीचा लालखी उत्सव शनिवार दि. 22 रोजी धार्मिक आणि सांस्कृतिक कार्यक्रमांनिशी साजरा होणार आहे. श्री चामुंडा लालखी उत्सव अक्षय्य तृतीय दिनी आयोजित करण्यात आला असून सकाळी 10 वा. श्री. जुवारकर यांच्या निवासस्थानी श्री चामुंडा देवीचे पूजन, महाअभिषेक, आरती व तीर्थप्रसाद होणार आहे. रात्री 9 वा. श्री चामुंडा देवीची लालखीतून वाजतगाजत दारुकामाच्या आतिषबाजीत मिरवणुकीनंतर श्रींच्या मूर्तीचे चामुंडा सभागृहात आगमन होईल. तद्नंतर पावणी व सांस्कृतिक कार्यक्रम सादर होतील. तत्पूर्वी जुवारकर यांच्या निवासस्थानी देवी असताना सायं. 4 ते सायं. 7 पर्यंत सुहासिनींतर्फे ओटी भरण्याचा कार्यक्रम होईल. रविवार दि. 23 रोजी सकाळी विविध धार्मिक विधी व रात्री 10 व. खोर्ली-म्हापसा येथील श्री सातेरी कालोत्सव मंडळातर्फे ‘आमी बायलो बिंदास’ हा महिला कलाकारांचा नाट्याप्रयोग सादर होणार आहे. लेखन सर्वेश (सिद्धार्थ) एकनाथ नाईक यांचे असून अरुण यशवंत कारेकर यांनी दिग्दर्शन केले आहे. त्यांना कोमल दिनेश कारेकर व ज्योती उदय धामस्कर यांनी सहकार्य केले आहे. बदल दिनेश कारेकर व लोकेश उमेश राठवड यांचे पार्श्वसंगीत लाभले आहे. या नाटकात अलिशा गणेश पाटकर, शुभांगी नारायण शिंदे, रोशन रमेश मठकर, सीमा उत्तम येंडे, भावना विनोद खेडेकर, किशोरी निशाकांत शिंदे, निकी दर्शन कारेकर व पूजा सुजय शिंदे या महिला कलाकारांनी भूमिका साकारल्या आहेत.