राष्ट्रीय कुस्ती स्पर्धेत लक्ष्मीचा डंका

बेळगाव : कुस्ती फेडरेशन ऑफ इंडिया व युपी कुस्ती संघटना आयोजित 17 वर्षाखालील फ्रीस्टाईल, ग्रीको रोमन  महिलांच्या कुस्ती स्पर्धेत बेळगावच्या हलगा-बस्तवाडची महिला मल्ल लक्ष्मी संजय पाटील हिने फ्रीस्टाईल प्रकारात 57 किलो वजनी गटात अंतिम फेरीत मणिपूरच्या यश चोबाचा 8-4 अशा गुणफरकाने पराभव करुन विजेतेपद पटकावले. यावर्षी लक्ष्मीने सर्व स्पर्धेतून आपली विजयी घोडदौड कायम राखली आहे. उत्तरप्रदेश, नंदीनीनगर गोंडा येथे घेण्यात आलेल्या 17 वर्षाखालील मुलींच्या कुस्ती स्पर्धेत लक्ष्मी पाटील हिने पहिल्या कुस्तीत केरळच्या श्रृती मोलचा 4-0 अशा गुणफरकाने पराभव करुन दुसऱ्या फेरीत प्रवेश केला. उपांत्यपूर्व फेरीत लक्ष्मी पाटील हिने पंजाबच्या विशाखा हिचा 8-4 अशा गुणफरकाने पराभव करुन उपांत्य फेरीत प्रवेश केला. उपांत्यफेरीत लक्ष्मी पाटील हिने तेलंगणाच्या नागालक्ष्मी हिचा 12-2 अशा गुणफरकाने पराभव करुन अंतिम फेरीत प्रवेश केला. अंतिम फेरीत मणिपूरच्या बलाढ्या मल्ल यश चोबा हिचा कडव्या लढतीत लक्ष्मीने पहिल्या फेरीत 3-3 असा समान गुण राहिले त्यामुळे पंचांनी टायब्रेकर नियमाचा वापर केला. त्यामध्ये लक्ष्मीने एकेरी पट काढीत गुण मिळवत पहिली फेरी जिंकली. दुसऱ्या फेरीत मात्र लक्ष्मीने चोबावर ताब मिळवत 4-1 अशी गुणाची अघाडी मिळवित शेवटी 8-4 अशा गुणफरकाने विजय संपादन करुन स्पर्धेचे विजेतेपद पटकाविले. स्पर्धेनंतर रेसलिंग फेडरेशन ऑफ इंडियाचे प्रमुख सचिव व्ही. एन. प्रसूद व उत्तरप्रदेश कुस्ती संघटनेचे अध्यक्ष खासदार ब्रिजभूषण शरणसिंग यांच्या हस्ते पदक व प्रमाणपत्र देऊन तिचा खास गौरव करण्यात आला. लक्ष्मी पाटील हिला तुकाराम गौडा, पुणे कुस्ती संकुलनचे संदीप पाठारे, निलेश पाटील यांचे बहुमूल्य मार्गदर्शन लाभत आहे. तर वडील संजय पाटील यांचे प्रोत्साहन मिळत आहे.