राष्ट्रीय ग्रिकरोमन कुस्ती स्पर्धेत कास्य पदकाची ठरली मानकरी
@ क्रीडा प्रतिनिधी/ बेळगाव
झारखंड रांची येथे घेण्यात आलेल्या राष्ट्रीय ग्रिको रोमन कुस्ती स्पर्धेत हलगा-बस्तवाडच्या लक्ष्मी संजय पाटील हिने 56 किलो वजनी गटात कास्य पदक पटकावित यश संपादन केले. प्रथमच राष्ट्रीय स्पर्धेत भाग घेतलेल्या लक्ष्मी हिने पदक मिळवून बेळगावचे नाव उज्वल केले आहे.
रांची येथे झालेल्या ग्रिको रोमन राष्ट्रीय कुस्ती स्पर्धेत लक्ष्मी पाटील हिने पहिल्या फेरीत झारखंडच्या आरतीकुमार हिचा 11-3 अशा गुण फरकाने पराभव करीत पुढील फेरीत प्रवेश केला. दुसऱया सामन्यात लक्ष्मी हिने पॉंडिचेरीच्या पी. दक्षया हिचा पराभव केला. केला. तिसऱया सामन्यात लक्ष्मीने केरळच्या धनीया एस. हिचा 7-3 अशा फरकाने पराभव करत विजय संपादन केला.
चौथ्या सामन्यात लक्ष्मीने हरियाणाच्या नेहा हिचा 11-8 अशा गुण फरकाने पराभव केला. पाचव्या सामन्यात लक्ष्मीने गुजरातच्या भूमिका हिचा 5-2 अशा गुण फरकाने पराभव करुन उपांत्य फेरीत प्रवेश केला. मात्र उपांत्य फेरीत दिल्लीच्या तमन्ना हिने 7-6 असा एक गुणाने पराभव करुन लक्ष्मीचा पराभव केला. कास्य पदकासाठी झालेल्या लढतीत डीआरच्या कोमलकुमारीचा लक्ष्मी हिने बायफॉल्ट पराभव करुन कास्य पदक पटकाविले.
लक्ष्मीला मान्यवरांच्या हस्ते पदक, प्रमाणपत्र व रोख रक्कम देवून गौरविण्यात आले. लक्ष्मी संजय पाटील ही सह्याद्री कुस्ती संकुलन पुणे येथे सराव करीत असून तीला निलेश पाटील, संदीप पठारे व विजय बराटे यांचे मार्गदर्शन तर युवजन क्रीडा खाते हल्ल्याळचे कुस्ती प्रशिक्षक तुकाराम गौडा यांचे प्रोत्साहन लाभत आहे. लक्ष्मीला ग्रामीणचे आमदार लक्ष्मी हेब्बाळकर यांचे आर्थिक पाठबळ लाभत आहे. तीच्या या यशामुळे तीचे सर्वत्रच अभिनंदन होत आहे.
