कुर्टी शाळा समूहाचा बाल आनंद मेळावा उत्साहात

उसगांव : कुर्टी फोंडा येथील कुर्टी शाळा समूहाचा बाल आनंद मेळावा उत्साहात साजरा करण्यात आला. कार्यक्रमाला प्रमुख पाहुणे म्हणून कुर्टी पंचायतीचे सरपंच नावेद तहसीलदार, पंचसदस्य भिका केरकर, अमेय विद्याप्रसारक मंडळाचे अध्यक्ष संदीप खांडेपारकर, कुर्टी शाळा समुहाच्या अध्यक्ष तथा दादा वैद्य हायस्कूलच्या मुख्dयाध्यापिका स्नेहा पंडित, समुहाच्या सचिव उषा टेंगसे, कोपरवाडा शाळेच्या मुख्dयाध्यापिका सुकांती देसाई आदी मान्यवर उपस्थित होते. बाल आनंद मेळाव्यांतर्गत अमेय प्राथमिक शाळा तांबडी कुर्टी व कोपरवाडा शाळेच्या विद्यार्थ्यांनी सांस्कृतिक कार्यक्रम सादर केले. निवृत्त शिक्षिका वसुंधरा नाईक, गौरी कामत व अर्चना डांगी यांचा मान्यवरांच्याहस्ते सत्कार करण्यात आला. सुफला नाईक, किरण नाईक व विभा प्रभू यांनी सत्कारमूर्तींचा परिचय करून दिला. यावेळी सरपंच नावेद तहसीलदार यांनी, प्राथमिक शिक्षण हे मातृभाषेतून होणे गरजेचे आहे, असे आवाहन केले. भिका केरकर व इतर मान्यवरांची यावेळी भाषणे झाली. विविध स्पर्धांतील विजेत्यांना पारितोषिके देण्यात आली. अनिता पंडित यांनी विद्यार्थ्यांची श्रेयनामावली सादर केली. स्नेहा पंडित यांनी स्वागत केले तर गौरी कामत यांनी पाहुण्यांचा परिचय करून दिला. उषा टेंगसे यांनी वार्षिक अहवाल सादर केला. सूत्रसंचालन मेधा देसाई यांनी तर अंकिता तारी यांनी आभार मानले.