Kolhapur News : कोल्हापूर महानगरपालिकेच्या चौकातच आज कोल्हापूर कृती समितीच्या एका पदाधिकाऱ्याला दोन ते तीन कार्यकर्त्यांनी जबर मारहाण केली. महापालिकेच्या वरच्या मजल्यावरून कृती समितीच्या पदाधिकाऱ्याला मारहाण करत भर चौकात त्याला शिवीगाळ केली.
घटनास्थळावरून मिळालेली माहिती अशी की, मारहाण झालेली व्यक्ती हा कोल्हापूर कृती समितीतील पदाधिकारी आहे. तर मारहाण करणारा व्यक्ती हा एका शाळेत शिक्षक असल्याचे सांगितले जाते. त्याच्या सांगण्यावरूनच तीन ते चार कार्यकर्त्यांनी येऊन कृती समितीच्या पदाधिकाराला मारहाण केली आहे. ही घटना दीड वाजण्याच्या सुमारास घडली आहे. संबंधित एका प्रकरणाची माहिती अधिकारातून घेत असल्याच्या कारणावरून ही मारहाण झाली असल्याचे समजले आहे. मात्र याबाबत गुन्हा नोंद झालेला नाही.
