कोल्हापूरकरांनी पुन्हा एकदा करून दाखवलं!

कोल्हापूर / दीपक जाधव :

प्रशासन आणि नागरिक एकत्र आल्यास काय होऊ शकते, याचं एक उत्तम उदाहरण घरगुती गणपती विसर्जनावेळी पाहायला मिळाले. काही जणांचा हट्ट झुगारून जीवनदायीनी पंचगंगा नदी विसर्जनाविना स्वच्छ ठेवली. नागरिकांनी 10 वर्षांपूर्वी सुरू केलेले ‘मिशन पंचगंगा प्रदूषणमुक्त’ यंदाही जपले गेले. जिह्यात पावणे तीन लाखांहून अधिक मूर्तींचे पर्यावरणपूरक पद्धतीने विसर्जन पार पडले.

जिह्यात मंगळवारी 5 दिवसांच्या गणपती बाप्पाला गौरीसह अतिशय भक्तिमय वातावरणात निरोप दिला. विशेष बाब म्हणजे या वर्षी विसर्जनात कोल्हापूरकरांची एकता दिसून आली. यावर्षी पंचगंगा दुथंडी वाहत होती तर कोल्हापूरकर नागरिक अख्ख्या महाराष्ट्राला एक नवीन शिकवण घालत होते.

यंदा राज्य शासनाने गणेशोत्सवाला राज्यमहोत्सव म्हणून मान्यता दिल्याने. भक्तांचा उत्साह ओसंडून वाहत होता. दहा वर्षांपासून पंचगंगा प्रदूषणमुक्तीसाठी पर्यावरणपूरक विसर्जन सुरू आहे. हिंदुत्ववादी संघटनांकडून ‘आमच्याच सणामुळे फक्त प्रदूषण होत नाही, त्याला अनेक कारणे आहेत, तर नदीत विसर्जनाचे आदेश आहेत, असा मुद्दा उपस्थित केला. तसेच नदी परिसरात बॅरिकेट्स काढून बंद केलेले मार्ग जमावाने काढले. याआधी सर्व कोल्हापूरकर गणेशमूर्तींचं विसर्जन नदीमध्ये करायचे. मात्र दहा वर्षांपासून हेच कोल्हापूरकर विसर्जन पर्यावरणपूरक पद्धतीने तेही महानगरपालिका व जिल्हा परिषदेच्या वतीने तयार केलेल्या कुंडात करतात. नागरिकांनी पर्यावरणपूरक गणेशोत्सव साजरा करण्यास महत्व दिले. यासाठी महानगरपलिका, जिल्हा परिषद, पर्यावरण प्रेमी, स्वयंसेवी संस्था एकवटल्या. जिल्हा परिषदेकडे 2 लाख 90 हजार 748 मूर्तींचं संकलन झाले. तर काही जणांनी घरातच विसर्जन केले. यामुळे काही प्रमाणात का होईना पंचगंगेचं प्रदूषण रोखण्यात कोल्हापूरकरांना यश आले. मंगळवारी रात्री उशिरापर्यंत जमा झालेल्या मूर्ती इराणी खणीत सोडण्याचे काम मनपा कर्मचारी करत होते.

आता महानगरपालिका, प्रदूषण नियंत्रण मंडळाने पंचगंगा नदी, रंकाळा तलाव, कोटीतीर्थ तलावाला प्रदूषण मुक्त करण्यासाठी पुढे यावे आणि प्रदूषित करणाऱ्या घटकांवर त्वरित कारवाई करावी, कोणत्याही परिस्थितीत जलप्रदूषण थांबवावे, अशी मागणी कोल्हापूरकर करत आहेत. लोकांनी त्यांची जबाबदारी पार पाडली, आता जबाबदारी आहे ती महापालिका अन प्रदूषण नियंत्रण मंडळाची?

• आजपर्यंत जि. प. कडे झालेले मूर्ती व निर्माल्यदान

वर्ष                घरगुती मूर्ती                   सार्व. मूर्ती                एकूण मूर्ती              घंटागाडी             ट्रॉली
2015              182442                            0                          182442                      0                    916

2016              235889                            0                          235889                      0                   1322

2017              246942                            0                          246942                    192                 1148

2018              268144                          798                        268942                     260                1100

2019              233950                         2969                       236919                     246                1245

2020              231544                         5861                       237405                     194                1123

2021               242191                       3046                        245237                     289                1460

2022               271449                       2590                        274039                      575               1251

2023                279723                     2810                          282533                      214               1424

2024                290068                       2418                        292486                       230              1392

2025                 290196                      552                          290748                       226              1305

एकुण                2772538                     21044                      2793582                     2426           13686

• आज पर्यंत महापालीकेकडे झालेले मूर्तीदान

वर्ष            एकुण मुर्ती
2021            53146
2022           51668
2023            57436
2024            57572
2025            60341