धामोड / वार्ताहर
कर्नाटकात ट्रॅक्टर आणायला गेलेल्या तरुणांचा परत येताना मुनवळी नरगुंद मार्गावर कार झाडावर आदळुन भीषण अपघात झाला. यात धामोड ( ता . राधानगरी ) येथील अजित चंद्रकांत धनवडे (वय ३९ ) याचा जागीच मृत्यु झाला. तर उमेश शिवाजी मराठे (वय ३४), कारचालक संतोष सुरेश सोनवणे (वय ४०) रा. दोघेही धामोड व दत्तात्रय लक्ष्मण बरगे (वय ४०) रा. पुंगाव हे तिघे गंभीर जखमी झाले असुन त्यांच्यावर सौंदत्ती येथील रुग्णालयात उपचार सुरु आहेत. ही घटना आज शुक्रवारी पहाटे सहाच्या सुमारास घडली.
याबाबतची अधिक माहिती अशी की, कारचालक संतोष सोनवणे हे ट्रॅक्टर खरेदी करण्यासाठी कोपळ (कर्नाटक ) येथे आपल्या कारमधून गेले होते. यावेळी त्यांच्यासोबत मित्र अजित यांच्यासह उमेश, दत्तात्रय व शुभम सुरेश कानकेकर ( रा . केळोशी खुर्दपैकी कानकेकरवाडी ) हे चौघे जण होते. ट्रॅक्टर खरेदी करून आपल्या मूळगावी रात्री परतत असताना सौंदत्तीपासून ३० कि.मी. अंतरावर असलेल्या नरगुंद मार्गावर आतमटी गावाजवळ कारचालक संतोष सोनवणे यांचा कारवरील ताबा सुटल्याने कारची झाडाला धडक बसली. यावेळी कार शेतवडीत जाऊन पलटी झाली. त्यामुळे कारचा चक्काचूर झाला. यात अजित याच्या छातीवर व डोक्यावर जोराचा मार बसल्याने त्याचा जागीच मृत्यु झाला. तर अन्य उमेश, संतोष व दतात्रय हे तिघेजण जखमी झाले आहेत. सुरवातीला गाडीत शुभम होता तर पाठीमागून दत्तात्रय ट्रॅक्टर चालवत होता . मात्र पहाटेला गाडीत दतात्रय बसला तर शुभम ट्रॅक्टर चालवू लागला त्यामुळे या अपघातातून शुभम हा बचावला .
दरम्यान अपघाताची माहिती मिळताच रामदुर्ग सर्कलचे डीएसपी रामनगौडा हटी, सीपीआय जे करणेश गौडा, उपनिरीक्षक आनंद कॅरीकट्टी यांनी घटनास्थळी भेट देऊन कारच्या मागे असलेल्या ट्रॅक्टर चालक शुभम सुरेश कानकेकर यांच्याकरवी अपघातातील जखमी व मृत व्यक्तींची ओळख पटवून कुटुंबियांना संपर्क साधला. त्यानुसार धामोड येथील अपघातातील मृत व जखमींच्या कुटुंबीयांनी घटनास्थळाकडे धाव घेतली. अपघातातील मृत अजित हे धामोड परिसरातील प्रसिद्ध ट्रॅक्टर व चारचाकी गाडींचे मेकॅनिकल होते. तर जखमी उमेश यांचा स्क्रॅप विक्रीचा व्यवसाय असुन, संतोष हे लाकूड व्यापारी तर दत्तात्रय हे शेतकरी आहेत. मृत अजित यांच्या पश्चात आई, वडील, पत्नी, दोन मुले, असा परिवार आहे. या अपघाताचा पुढील तपास सीपीआय जे. करूणेश गौडा करीत आहेत .
अजित हा शांत, संयमी, सुशिक्षित वैचारीक श्रेणीचा होता . मुले शुभम , रोहन यांच्या उच्चतम शिक्षणाचे ध्येय ठेऊन श्रम करीत होता मात्र त्याच्या निधनाने संपूर्ण धामोड परिसरात शोककळा पसरली आहे .
