राजर्षी शाहू छत्रपती महाराजांच्या स्मृतीशताब्दी वर्षानिमित्त स्पर्धां’चे आयोजन
कोल्हापूर प्रतिनिधी
कुस्तीचे आश्रयदाते राजर्षी छत्रपती शाहू महाराजांच्या स्मृतीशताब्दी वर्षानिमित्त कुस्तीपंढरी कोल्हापूरच्या खासबाग मैदानात येत्या नोव्हेंबरमध्ये राष्ट्रीय स्तरावरील मातीतील कुस्ती स्पर्धेचे आयोजन करण्यात येणार आहे. खासदार संभाजीराजे व भारतीय कुस्ती महासंघाचे अध्यक्ष खासदार बृजभूषण शरण सिंह यांच्यामध्ये सोमवारी झालेल्या बैठकीत स्पर्धा आयोजनावर शिक्कामोर्तब करण्यात आला. पुरुष व महिला अशा दोन्ही विभागात होणाऱया या स्पर्धेत देशभरातील नामांकित 300 हून अधिक मल्ल सहभागी होणार आहे.
दरम्यान, स्पर्धेच्या पुढील नियोजनासाठी खासदार संभाजीराजे यांच्या पुढाकारातून कोल्हापूर जिल्हा राष्ट्रीय तालीम संघाचे पदाधिकारी व राष्ट्रीय कुस्ती महासंघाचे सचिव यांची संयुक्त बैठक 2 मे रोजी दिल्ली येथे आयोजित केली आहे.
खासदार छत्रपती संभाजीराजे यांनी काही दिवसांपूर्वी भारतीय कुस्ती महासंघाचे अध्यक्ष खासदार बृजभूषण शरण सिंह यांची भेट घेऊन त्यांना राजर्षी शाहू महाराजांनी कुस्तीच्या विकासासाठी केलेले कार्य, योगदानाची माहिती दिली होती. देश, परदेशातील मल्लांना राजाश्रय दिल्याने कोल्हापूरची कुस्ती कशी बहरली, त्याचा देशातील कुस्तीला झालेला फायदा, रोम देशातील कुस्ती मैदानाच्या धर्तीवर कोल्हापूरमध्ये उभारलेले ऐतिहासिक खासबाग मैदान याविषयी देखील अवगत केले होते. कुस्तीच्या उद्धारासाठी शाहू महाराजांनी जे उत्तुंग कार्य केले आहे. या कार्याप्रती कृतज्ञता व्यक्त करण्यासाठी शाहू महाराजांच्या स्मृतीशताब्दी वर्षात कोल्हापूरच्या खासबाग कुस्ती मैदानात राष्ट्रीय स्तरावरील मातीतील कुस्ती स्पर्धा भरवावी, अशी मागणी संभाजीराजे यांनी केली होती. त्यावेळीच त्यांनी बृजभूषण यांनी सकारात्मकता दर्शवली होती.
दिल्लीतील बैठकीत स्पर्धा आयोजनावर शिक्कामोर्तब
दरम्यान, दिल्ली येथे सोमवारी झालेल्या बैठकीत नोव्हेंबर महिन्यात आपण खासबाग मैदानात राष्ट्रीय कुस्ती स्पर्धांचे आयोजन करू, अशी ग्वाही बृजभूषण शरण सिंह यांनी संभाजीराजे यांना दिली. पुरुष व महिला अशा दोन्ही विभागांच्या स्पर्धा असणार असून देशभरातील नामांकित असे 300 हून अधिक मल्ल या स्पर्धेत सहभागी होतील. स्पर्धेच्या पुढील नियोजनासाठी कोल्हापूर जिल्हा राष्ट्रीय तालीम संघाचे पदाधिकारी व राष्ट्रीय कुस्ती महासंघाचे सचिव यांची संयुक्त बैठक 2 मे रोजी दिल्ली येथे आयोजित केली असल्याची माहिती संभाजीराजे यांनी दिली.
राजर्षी शाहू महाराजांच्या स्मृती शताब्दी वर्षात खासबाग मैदानात राष्ट्रीय कुस्ती स्पर्धा होणार ही बाब कुस्तीपटू, कुस्तीशौकिनांसह सर्व शाहूप्रेमींचा उत्साह वाढविणारी आहे. भारतीय कुस्ती महासंघाचे विशेष आभार.
-खासदार संभाजीराजे छत्रपती
