सौर ऊर्जेवर केली जाणार वीज निर्मिती; 71 उपकेंद्रे,2148 एकर जमीन, 345 मेगावॅट सौरऊर्जा निर्मिती निविदा प्रक्रिया सुरु
कोल्हापूर प्रतिनिधी
कृषी सिंचनासाठी दिवसा वीज मिळावी, या हेतूने राज्य शासनाच्या वतीने महावितरण मार्फत मुख्यमंत्री सौर कृषी वाहिनी योजना राबविली जात आहे. या योजनेतील पहिल्या टप्प्यासाठी निविदा प्रक्रिया सुरु करण्यात आली आहे. ‘अभियान 2025‘ अंतर्गत कोल्हापूर व सांगली जिह्यातील 71 उपकेंद्रांच्या ठिकाणी 2148 एकर जमिनीवर 345 मेगावॅट क्षमतेचे सौर ऊर्जा निर्मितीचे प्रकल्प उभारण्यात येणार आहेत. याव्दारे 1 लक्ष 24 हजार कृषी ग्राहकांना सिंचनासाठी दिवसा वीजेची सोय होणार आहे.
शेतीला दिवसा, अखंडित व शाश्वत वीज देण्यासाठी कृषी क्षेत्राचा वीज भार असण्राया वीजवाहिन्यांचे सौरऊर्जीकरण करण्यात येणार आहे. 33/11 केव्ही उपकेंद्राच्या ठिकाणी 5 ते 10 किलोमीटर परिघातील गायरान, नापीक व पडिक जमिनीवर 0.5 ते 25 मेगावॅट क्षमतेचे विकेंद्रीत सौर प्रकल्प उभारणी करण्यात येणार आहेत. सौर प्रकल्पासाठी शासकीय जमीन नाममात्र 1 रूपये या दराने भाडेपट्टा व पोटभाडेपट्ट्याने उपलब्ध करून देण्यास मान्यता देण्यात आली आहे. ज्या ग्रामपंचायतींच्या कार्यक्षेत्रात प्रकल्प कार्यान्वित झाला असेल, त्या ग्रामपंचयातींना 5 लक्ष प्रोत्साहनात्मक आर्थिक मदत 3 वर्षासाठी देण्यात येणार आहे.
कोल्हापूर जिह्यातील 43 उपकेंद्रांच्या ठिकाणी 795 एकर जमिनीवर 159 मेगावॅट क्षमतेचे सौर ऊर्जा प्रकल्प उभारण्यात येणार आहेत. त्याव्दारे अंदाजे 65 हजार कृषी ग्राहकांना सिंचनासाठी दिवसा वीज मिळणार आहे. जिह्यातील करवीर तालुक्यातील 33/11 केव्ही उपकेंद्र- कोगे (सौर प्रकल्प गावाचे नाव -बहिरेश्वर), बालिंगा (आडूर), गगनवाबडा तालुक्यात गगनबावडा (गगनबावडा), मार्गेवाडी -निवडे (म्हाळुंगे), पन्हाळ्यात पडळ (माजगाव), बाजारभोगाव (पिसात्रे), सातवे (सावर्डे तर्फे सातवे), वेतवडे (हारपवडे), पाटपन्हाळा (पाटपन्हाळा), कळे (परखंदळे) शाहूवाडी तालुक्यात शाहूवाडी (कोळगाव), सरुड (सरुड), वारुळ (वारुळ), मांजरे (मांजरे), कागलमध्ये सिध्दनेर्ली (बामणी), सोनगे (बानगे व कुरुकली), केनवडे (केनवडे), भुदरगडमध्ये पिंपळगाव (बामणे), कडगाव (तिरवडे), तांबाळे (अनफ बुद्रुक), शेलोली (शेलोली) हातकणंगले तालुक्यात चोकाक (हेर्ले), हातकणंगले (आळते), कुंभोज (नेज), हुपरी (रेंदाळ), किणी वाठार (किणी व वाठार तर्फे वडगाव), शिरोळमध्ये कोथळी (कोथळी), अब्दुललाट (लाट), कोंडिग्रे (हरोली), राधानगरीत सोळांकुर (नरतवडे), चंदगड तालुका: चंदगड (काजिर्णे व चुर्णीचा वाडा), कोवाड (कोवाड), हालकर्णी (डुक्करवाडी), हालकर्णी एमआयडीसी (जंगमहट्टी), पार्ले (पार्ले), माणगाव (माणगाव), अडकूर (आमरोली व उत्साळी), गडहिंग्लजमध्ये नेसरी (सांबरे व तावरेडी), महागांव (हारळी बुद्रुक), गडहिंग्लज एमआयडीसी (शेंद्री), हेब्बाळ- क.नुल (हनिमनाळ व हासुर चंपु), आजरामध्ये उत्तुर (मुमेवाडी व उत्तुर), गवसे (हारपवडे) उपकेंद्रे व गावांचा योजनेत समावेश आहे.
खुल्या निविदेमार्फत दर आधारित बोलीव्दारे विकासकांबरोबर वीज खरेदी करारनामा (पीपीए) व महावितरण कंपनीसोबत वीज विक्री करारनामा (पीएसए) करून प्रकल्प उभारण्यात येतील. प्रकल्प जमीन व परवानग्यासाठी विशेष हेतू वाहन (एसपीव्ही) व्यवस्था आहे. निविदा प्रक्रियेत प्रवर्तक, सहकारी संस्था, राष्ट्रीय ,आंतरराष्ट्रीय खाजगी विकासक, राज्य आणि केंद्र शासनाच्या सार्वजनिक उपक्रम कंपनी, वैयक्तिक विकासक, शेतकरी, शेतकऱ्यांचा गट, उत्पादक समूह आदी सहभाग घेण्यास पात्र आहे. कोल्हापूर परिमंडळाचे मुख्य अभियंता परेश भागवत यांच्या निर्देशानुसार अधिक्षक अभियंता अंकुर कावळे (कोल्हापूर), अधिक्षक अभियंता धर्मराज पेठकर (सांगली) यांच्या मार्गदर्शनाखाली दोन्ही जिह्यातील महसूल विभागाच्या मोलाच्या सहकार्याने अतिरिक्त कार्यकारी अभियंता (स्थापत्य) देवदत्त हासबे व सहाय्यक अभियंता (स्थापत्य) विश्वजित कांबळे यांनी परिश्रम घेतले.
शेतकरी जमीन द्यायला तयार, पण महावितरणच्या तांत्रिक अडचणी
कोल्हापूर जिह्यातील 61 उपकेंद्रे व सांगली जिह्यातील 93 उपकेंद्रे योजनेसाठी प्रतिक्षेत आहेत. या योजनेतून या उपकेंद्राच्या ठिकाणी सौर प्रकल्प उभारणी करण्यासाठी ग्रामपंचायतींनी व ग्रामस्थांनी जमीन उपलब्ध करून देण्यासाठी पुढाकार घ्यावा. जेणेकरुन त्या परिसरातील कृषी ग्राहकांना या योजनेचा लाभ घेता येईल असे आवाहन महावितरणने केले आहे. पण जिह्यातील अनेक शेतकरी शेकडो एकर पडीक जमिन सौरऊर्जा प्रकल्पास देण्यासाठी तयार असले तरी महावितरणकडून त्यांना तांत्रिक अडचणी सांगितल्या जात आहे. त्यामुळे महावितरणने संबंधित तांत्रिक अडचणी दूर केल्यास शेतकऱ्यांकडून मोठ्या प्रमाणात जमिन उपलब्ध करून दिली जाणार आहे.
