प्रभारी जिल्हाधिकारी संजय शिंदे यांचा आज राज्यपालांच्या हस्ते होणार सत्कार : वर्षात 2 कोटींचा ध्वज निधी संकलन : 124 टक्के उदिष्ट पूर्ण
कोल्हापूर :
ध्वज निधी संकलनात कोल्हापूर पुन्हा एकदा टॉपमध्ये राहिले आहे. राज्यात सर्वाधिक निधी मिळवणाऱ्या जिल्ह्यामध्ये कोल्हापूर तिसऱ्या क्रमांकावर आहे. याबद्दल आज, शनिवारी कोल्हापूरचे प्रभारी जिल्हाधिकारी संजय शिंदे यांचा मुंबईतील राजभवनात राज्यपालांच्या हस्ते सत्कार होणार आहे.
देशाच्या सीमेचे रक्षण करण्यासाठी सैनिक जीवाची बाजी लावत असतात. या सैनिकांच्या मदतीसाठी ध्वजदिन निधी संकलन केला जातो. हे काम म्हणजे देशकार्यच मानले जाते. संकलित होणार निधी सैनिक, माजी सैनिक, शहीद झालेल्या सैनिकांच्या कुटूंबासाठी वापरला जातो. सैनिकांसाठी भरघोस निधी जमा व्हावा यासाठी शाळा, महाविद्यालयासह शासकीय कार्यालयातील विविध विभागालाही उद्दिष्ट दिले जाते. सैनिकांसाठी प्रत्येक नागरिक व विद्यार्थी जास्ती जास्त निधी संकलनासाठी प्रयत्न करत असतात. राज्यातील सर्वात जास्त ध्वज निधी संकलन करणाऱ्या जिल्ह्यातील जिल्हाधिकारी तथा सैनिक कल्याण अधिकाऱ्यांचा सन्मान आणि सत्कार केला जातो. कोल्हापूर जिल्हा नेहमी ध्वज निधी संकलनाच्या यादीत टॉपवर असतो.
ध्वज निधी सशस्त्र सेना ध्वज दिन 2023 च्या संकलनामध्येही कोल्हापूरने सर्वात जास्त निधी संकलन केला आहे. त्यामुळे राजभवन मुंबई येथे आज, शनिवारी ध्वजदिन निधी संकलन 2024 चे प्रारंभ होणार आहे. या कार्यक्रमांमध्ये राज्यपालांच्या स्वाक्षरीचे प्रशस्तीपत्र व स्मृतिचिन्ह देऊन कोल्हापूरचे प्रभारी जिल्हाधिकारी संजय शिंदे यांचा सत्कार करण्यात येणार आहे. त्याचबरोबर या जिह्याचे जिल्हा सैनिक कल्याण अधिकारी लेफ्टनंट कर्नल डॉ. भीमसेन केशव चवदार (निवृत्त) यांचा सुद्धा सन्मान व प्रशस्तीपत्र व स्मृतीचिन्ह देऊन करण्यात येणार आहे. कोल्हापूर जिह्यासाठी ही फार अभिनंदनिय बाब आहे.
उद्दिष्टपेक्षा जास्त ध्वज निधी संकलन
सशस्त्र सेना ध्वज दिन निधी 2023 साठी कोल्हापूर जिह्याला 1 कोटी 60 लाख 79 हजार इतके उद्दिष्ट होते. कोल्हापूर जिह्यांमध्ये वर्षभरात ध्वज दिन निधी दोन कोटी रूपये जमा झाला आहे. उद्दिष्टाच्या 124.38 टक्के इतका निधी संकलन झाले आहे. त्यासाठी ज्या शासकीय कार्यालयानी व व्यक्तिगत देणग्या देऊन हा उद्दिष्ट पूर्ण केला त्या सर्वांचे हे यश आहे.
