कळंबा, प्रतिनिधी
Kalamba Lake Overflow : शहरासह जिल्ह्यात गेले आठ दिवस सुरू असणाऱ्या जोरदार पावसाने धरणांसह तलाव भरत आहेत. शुक्रवारी शहरा लगत असणारा ऐतिहासिक कळंबा तलाव पूर्ण क्षमतेने भरला. सायंकाळच्या सुमारस तलाव ओव्हरफ्लो झाला. यंदाच्या पावसाळ्यात प्रथमच तलावातील पाणी सांडव्यावरून ओसंडून वाहू लागले. हे विहंगम दृश्य पाहण्यासाठी हौशी पर्यटकांसह कळंबा ग्रामस्थांची तलावावर मोठी गर्दी झाली.
गेल्या दहा दिवसंपासून झालेल्या दमदार पावसाने अवघ्या सात फुटांवर असणारी पाणीपातळी गुरूवारी रात्रीपर्यंत २६ फुटांवर पोहोचली. पावसाचा जोर कायम असल्याने तलावाच्या पाणलोट क्षेत्रात झपाट्याने वाढ होत आहे. त्यामुळे शनिवारी सांडव्यावरून पाण्याचा विसर्ग सुरु झाला.
यंदा महापालिकेकडून बेसुमार पाणी उपशामुळे एप्रिल ते मे मध्ये तलावाचे पात्र कोरडे पडले होते. पाणी पातळीत मोठी घट झाली होती. गेल्या दहा दिवसंपासून पावसाने हजेरी लावल्याने तलाव सांडव्यावरून ओसंडून वाहण्याची शहरासह कळंबा ग्रामस्थांना आस लागली होती. गेले दहा दिवस शहरासह तलावाच्या पाणलोट क्षेत्रात पाऊस झाला. यामध्ये तलावाचे मुख्य स्तोत्र असणाऱ्या कात्यायनी टेकड्यातून वाहणारे सात नैसर्गिक नाले, ओढे दुतोंडी भरून ओसंडून वाहू लागले. त्यामुळे कळंबा तलावाच्या पाणी पातळी वाढ झाली. ती सत्तावीस फुटांवर पोचली असून शनिवारी अखेर तलाव सांडव्यावरून ओसंडून वाहू लागला.
