कळे/ वार्ताहर
सावर्डे तर्फ असंडोली, तालुका पन्हाळा येथील श्री ज्योतिर्लिंग मंदिरात सावर्डेसह मल्हार पेठ, मोरेवाडी, जाधववाडी या चार गावातील ग्रामस्थ मोठ्या भक्तीभावाने नवरात्रोत्सव साजरा करतात. येथील ज्योतिर्लिंग हे चार गावतील ग्रामस्थांचे कुलदैवत आहे. त्यामुळे येथील नवरात्रोत्सव मोठ्या भक्तीभावाने नवरात्रोत्सव साजरा केला जातो. या कालावधीत मंदिरातील पुजारी प्रदीप वसंत गुरव यांच्यासह त्यांच्या कुटुंबातील सदस्य आणि गुरव समाज बांधवांनी गेले सात दिवस श्री ज्योतिर्लिंगाची अत्यंत उत्कृष्ट पूजा बांधली आहे. प्रत्येक दिवशी विविध रूपातील पूजा बांधून भाविकांचे लक्ष वेधून घेतले. त्याबद्दल मल्हार पेठ सावर्डे आणि मोरेवाडीतील ग्रामस्थांनी त्यांचा सत्कार केला. यावेळी मंदिराची रंगरंगोटी, विद्युत रोषणाईसह अन्य कामे केल्याबद्दल तिन्ही गावातील ग्रामपंचायत कर्मचारी आणि विद्युत रोषणाई आणि रंगरंगोटी करणाऱ्या ग्रामस्थांचा मान्यवरांच्या हस्ते सत्कार करण्यात आला.
यावेळी सावर्डेचे सरपंच संभाजी कापडे, मल्हार पेठचे सुदर्शन पाटील, मोरेवाडीचे सरपंच रणजीत तांदळे, मल्हारपेठचे उपसरपंच राजेंद्र महाजन, तरुण भारतचे विशेष प्रतिनिधी कृष्णात चौगले, यांच्यासह तिन्ही गावातील ग्रामपंचायत सदस्य, ग्रामस्थ आणि भाविक मोठ्या संख्येने उपस्थित होते. डी.बी. भोसले यांनी सूत्रसंचालन केले. मोरेवाडीचे सरपंच रणजित तांदळे यांनी या कार्यक्रमाचे आयोजन केले होते.
