देवदर्शनानंतर परतताना काळाचा घाला : मयत जोडपे निपाणी तालुक्यातील कोडणी गावचे
प्रतिनिधी/सरवडे
दहा चाकी ट्रकने दुचाकीला समोरासमोर धडक दिल्याने मोटरसायकल वरील पती- पत्नी जागीच ठार झाले. हा अपघात निपाणी – राधानगरी रस्त्यावर बोरवडे फाटा क्रमांक दोन जवळ असलेल्या ओढ्यावरती झाला. त्यामध्ये निपाणी तालुक्यातील कोडणी येथील भैरवनाथ आप्पासो पाटील (वय अंदाजे ४५) व त्यांची पत्नी पुनम (वय अंदाजे ३८) मृत झाले. ते दोघे दुर्गमानवाड येथून विठ्ठलाई देवीचे दर्शन घेऊन गावाकडे परत जात असताना काळाचा घाला पडला. अपघातानंतर पळून चाललेला ट्रक चालक विठ्ठल शिवाप्पा झिपरे (वय २५ रा. खडकलाट) याला खिंडी व्हरवडे (ता.राधानगरी) येथे मुरगूड व राधानगरी पोलिसांनी पकडले.
