वाकरे, प्रतिनिधी
Kolhapur Accident News : कोल्हापूर- गगनबावडा राष्ट्रीय मार्गावर वाकरे फाटा ते दोनवडे फाटा दरम्यान पेट्रोल पंपासमोर रविवारी दुपारी साडे बारा वाजता अज्ञात टेम्पोने धडक दिल्याने गंभीर जखमी झालेल्या दुचाकीस्वाराचा उपचार सुरू असताना सोमवारी पहाटे मृत्यू झाला.प्रतिक युवराज कांबळे (वय २१),रा. वाकरे ता.करवीर असे मृत तरुणाचे नाव आहे.
या अपघाताबाबत करवीर पोलीस व घटनास्थळावरून मिळालेली माहिती अशी की, प्रतिक कांबळे हा वाकरे येथील विद्यार्थी असून, रविवारी दुपारी तो दोनवडे ते वाकरे फाट्यानजीक असलेल्या पेट्रोल पंपावर दुचाकीमध्ये पेट्रोल घालण्यासाठी गेला होता. पेट्रोल टाकून घरी जात असताना साडेबारा वाजता मोठ्या उतारावर भरधाव वेगाने जाणाऱ्या अज्ञात टेम्पोने त्याला धडक दिली. यामध्ये प्रतीकचे डोके रस्त्यावर आपटले.
अपघातस्थळी रक्ताचे थारोळे पडले होते. डोके रस्त्यावर आपटल्याने तो गंभीर जखमी झाला. त्याला उपचारासाठी कोल्हापूर येथील एका खाजगी रुग्णालयात दाखल केले होते. मात्र उपचार सुरू असताना सोमवारी पहाटे दोनच्या सुमारास त्याचा मृत्यू झाला. प्रतिकच्या मृत्यूने शाहूनगर वाकरे येथे हळहळ व्यक्त होत आहे. त्याच्या पश्चात आई-वडील असा परिवार आहे.
