केएलएस जीआयटीकडे व्हीटीयू चषक

बेळगाव : केएलएस, जीआयटी तांत्रिक महाविद्यालय आयोजित व्हीटीयू चषक विभागीय स्पर्धेच्या अंतिम सामन्यात जीआयटी कॉलेजने अंगडी कॉलेजचा 3-2 अशा गोलफरकाने पराभव करून व्हीटीयू चषक पटकाविला. दर्शनला उत्कृष्ट खेळाडू तर अभिषेकला उत्कृष्ट गोलरक्षक म्हणून गौरविण्यात आले. पहिल्या उपांत्यफेरीच्या सामन्यात जीआयटीने केएलईआयटी हुबळीचा 1-0 असा निसटता पराभव केला. दुसऱ्या उपांत्यफेरीच्या सामन्यात एआयटीएम अंगडी संघाने व्हीटीयू बेळगाव संघाचा 2-0 असा पराभव केला. अंतिम सामन्यात 12 व्या मिनिटाला जीआयटीच्या बसवरावच्या पासवर अर्जुन मेलगेने गोल करून 1-0 ची महत्त्वाची आघाडी मिळवून दिली. 18 व्या मिनिटाला अर्जुन मेलगेच्या पासवर दर्शनने दुसरा गोल केला तर 22 व्या मिनिटाला दर्शनच्या पासवरती अर्जुन मेलगेने तिसरा गोल करून 3-0 ची आघाडी पहिल्या सत्रात मिळवून दिली. दुसऱ्या सत्रात 35 व्या मिनिटाला प्रज्वलच्या पासवर अंगडीच्या शशांकने पहिला गोल करून 1-3 अशी आघाडी कमी केली. 44 व्या मिनिटाला ओमच्या पासवर शशांकने दुसरा गोल करून 2-3 अशी आघाडी कमी केली. त्यानंतर मात्र बरोबरी साधण्यास एआयटीएम अंगडी संघाला अपयश आल्याने 3-2 च्या फरकाने पराभव करून विजेतेपद पटकाविले.सामन्यानंतर प्रमुख पाहुणे प्राचार्य एम. एस. पाटील, प्रा. सतीश देशपांडे, वसंत दमुने, आकाश मंडोळकर,ओजेस रेवणकर व विजय रेडेकर यांच्या हस्ते विजेत्या जीआयटी व उपविजेत्या अंगडी संघाला चषक व प्रमाणपत्र देऊन गौरविण्यात आले.