किरण निपाणीकर यांचे कुंभमेळ्याहून परतताना वाराणसी येथे निधन

बेळगाव : महाशिवरात्रीनिमित्त प्रयागराजला (कुंभमेळा) जाऊन परतताना वाराणसी येथे बेळगाव येथील सामाजिक कार्यकर्ते किरण यल्लाप्पा निपाणीकर (वय 47) यांचे गुरुवार दि. 27 रोजी पहाटे 4 च्या दरम्यान हृदयाघाताने निधन झाले. शुक्रवार दि. 28 रोजी सकाळी त्यांचे पार्थिव दिल्लीहून विमानाने बेळगावला आणले जाणार आहे. किरण हे चार दिवसांपूर्वी महाशिवरात्रीनिमित्त आपल्या मित्रांसमवेत प्रयागराजला कुंभमेळ्यात पुण्यस्नान करण्यासाठी गेले होते. तेथून पुन्हा माघारी परतताना वाराणसी येथे बुधवारी दुपारी त्यांना हृदयविकाराचा तीव्र झटका आला. त्यामुळे त्यांना तात्काळ हॉस्पिटलमध्ये दाखल करण्यात आले. मात्र उपचाराचा उपयोग न झाल्याने गुरुवारी पहाटे चारच्या दरम्यान मृत्यू झाला. किरण हे सामाजिक कार्यकर्ते होते. कॅन्टोन्मेंट हद्दीतील विहिरींचे पुनरुज्जीवन करण्यात त्यांचा महत्त्वाचा वाटा होता. तसेच लष्करात भरतीसाठी आलेल्या तरुणांच्या राहण्यासह भोजन व नाष्ट्याची सोय त्यांनी केली होती. मात्र त्यांच्या आकस्मिक निधनाने सर्व स्तरातून हळहळ व्यक्त होत आहे. त्यांचे पार्थिव शुक्रवार दि. 28 रोजी सकाळी दिल्लीहून विमानाने बेळगावला आणण्यात येणार आहे. त्यांच्या पश्चात आई, पत्नी, दोन मुले, बहीण, मेहुणे, पुतणे असा परिवार आहे. महापालिकेच्या अधीक्षक अभियंत्या लक्ष्मी निपाणीकर यांचे ते बंधू होत.