कीर्ति सुरेश करणार बॉलिवूडमध्ये पदार्पण

‘वीडी18’ या चित्रपटाची घोषणा अलिकडेच करण्यात आली असून यात वरुण धवन मुख्य भूमिकेत असणार आहे. या चित्रपटाची निर्मिती दिग्दर्शक एटली यांची प्रॉडक्शन कपंनी तसेच सिने 1 स्टुडिओजकडून केली जाणार आहे. वरुण धवनच्या या चित्रपटातून एक प्रसिद्ध दाक्षिणात्य अभिनेत्री बॉलिवूडमध्ये पदार्पण करणार आहे. हा एक मेगाबजेट अॅक्शन चित्रपट असून यात वरुणसोबत दोन अभिनेत्री दिसून येणार आहेत. पहिली अभिनेत्री म्हणून कीर्ति सुरेशच्या नावावर शिक्कामोर्तब झाले आहे. तर दुसऱ्या अभिनेत्रीची अद्याप निवड करण्यात आलेली नाही. कीर्ति सुरेशने ‘महानटी’ चित्रपटाद्वारे देशविदेशात स्वत:चा मोठा चाहतावर्ग निर्माण केला आहे. कीर्ति हिला दक्षिणेतील सर्वात आघाडीची अभिनेत्री मानले जाते. तिच्या ‘भोला शंकर’ या चित्रपटाची सध्या मोठी चर्चा होत आहे. याचबरोबर ती ‘रिव्हॉल्व्हर रीता’, ‘रघु ताता’ आणि ‘कन्न देवी’ या चित्रपटांमध्ये दिसून येणार आहे. ‘वीडी18’ या चित्रपटाचे दिग्दर्शन तमिळ चित्रपटसृष्टीतील प्रसिद्ध दिग्दर्शक कलीस करणार आहेत.