बेळगाव स्पोर्ट्स क्लबकडे करडी चषक

बेळगाव : आनंद क्रिकेट अकादमी आयोजित करडी चषक 14 वर्षाखालील आंतरक्लब  क्रिकेट स्पर्धेच्या अंतिम सामन्यात बेळगाव स्पोर्ट्स क्लबने आनंद अकादमीचा 6 गड्यांनी पराभव करून करडी चषक पटकाविला. मयूर जाधव याला सामनावीर तर सिद्धार्थला मालिकावीराने गौरविण्यात आले. भगवान महावीर मैदानावर खेळविण्यात आलेल्या अंतिम सामन्यात आनंद अकादमीने प्रथम फलंदाजी करताना 22 षटकात सर्व गडी बाद 79 धावा केल्या.  त्यात भूषण देसाईने 2 चौकारांसह 15, पृथ्वीराज गोलीहाळीने 14 धावा केल्या. बेळगाव स्पोर्ट्स क्लबतर्फे मयूर जाधवने 10 धावांत 3 गडी बाद केले. प्रत्युत्तरादाखल खेळताना बेळगाव स्पोर्ट्सने 19 षटकात 4 गडी बाद 80 धावा करून सामना 6 गड्यांनी जिंकून करडी चषक पटकाविला. त्यात इम्तियाजने 9 चौकारांसह 50 धावा करून अर्धशतक झळकविले. आनंदतर्फे आयन मुल्लाने 22 धावांत 2 गडी बाद केले. सामन्यानंतर प्रमुख पाहुणे सर्व्हिसचे रणजी क्रिकेटपटू सचिन शिंदे, अमित शिंदे, युविना फर्नाडिस, इम्यॅनुअल सय्यद, प्रमाद पालेकर व आनंद करडी यांच्या हस्ते विजेत्या बेळगाव स्पोर्ट्स क्लब व उपविजेत्या आनंद अकादमी संघांना चषक, प्रमाणपत्र व सर्व खेळाडूंना पदके देऊन गौरविण्यात आले. अंतिम सामन्यातील सामनावीर मयूर जाधव, उत्कृष्ट फंलदाज स्कंद शेट्टी, उत्कृष्ट गोलंदाज अवनिश बसुर्तेकर, मालिकावीर सिद्धार्थ यांना चषक देऊन गौरविण्यात आले. स्पर्धेसाठी पंच म्हणून विरेश गौडर, महेश जवळी, पंकज सुतार यांनी काम पाहिले. ही स्पर्धा यशस्वी करण्यासाठी आनंद अकादमीच्या सभासदांनी विशेष परिश्रम घेतले.