दाक्षिणात्य स्टार राम चरणला कन्यारत्न

दाक्षिणात्य सुपरस्टार राम चरण अन् त्याची पत्नी उपासना कोनिडेला पहिल्यांदाच पालक झाले आहेत. 20 जून रोजी उपासनाने मुलीला जन्म दिला आहे. रामचरण अन् उपासनाने डिसेंबर महिन्यात सोशल मीडिया पोस्टद्वारे आपण आईवडिल होणार असल्याची घोषणा केली होती. उपासना अन् रामचरणने विवाहाच्या 11 वर्षांनी स्वत:च्या पहिल्या अपत्याचे स्वागत केले आहे. रामचरणचे पिता सुपरस्टार चिरंजीवी आणि त्यांचे पूर्ण कुटुंब स्वत:च्या नातीचे स्वागत करण्यासाठी मंगळवारी सकाळी रुग्णालयात पोहोचले. मुलीच्या जन्माची माहिती कळताच रामचरणचे चाहते आनंदून गेले आहेत.  अनेक चाहत्यांनी रुग्णालयाबाहेर पोहोचून स्वत:चा आनंद व्यक्त केला आहे. राम चरण हा तेलगू चित्रपटसृष्टीतील मोठा स्टार आहे. आरआरआर या चित्रपटातील अभिनयानंतर राम चरणचे देशभरात चाहते निर्माण झाले आहेत. या चित्रपटाला ऑस्कर पुरस्कार मिळाला होता. राम चरण लवकरच काही तेलगू चित्रपटांमध्ये दिसून येणार आहे. चाहते त्याच्या चित्रपटाची आतुरतेने प्रतीक्षा करत असतात.