यावर्षी अद्याप एकूण 4858.8 मि. मी. पावसाची नोंद
वार्ताहर/ कणकुंबी
उत्तर कर्नाटकातील सर्वाधिक पावसाचे ठिकाण म्हणून प्रसिद्ध असलेल्या कणकुंबी भागात गेल्या पाच-सहा दिवसांपासून संततधार पाऊस पडत असून 15 ते 19 ऑगस्ट या पाच दिवसांत 570 मि. मी. तर यावर्षी 4858.8 मि. मी. पावसाची नोंद कणकुंबी पर्जन्यमापक केंद्रात झाली आहे.
खानापूर तालुक्यातील कणकुंबी (आमगाव, चोर्ला व हुळंद आदी गावे) भाग उत्तर कर्नाटकातील सर्वाधिक पावसाचे ठिकाण म्हणून ओळखला जातो. कर्नाटकातील सर्वाधिक पावसाचे ठिकाण असलेल्या अगुंबेपेक्षाही कणकुंबी भागातील आमगाव येथे अधिक पावसाची नोंद झाली आहे. वर्षाकाठी सरासरी 6 हजार मि. मी. पावसाची नोंद होते. कमितकमी पाच हजार मि. मी. तर जास्तीत जास्त साडेसात हजार मि. मी. पाऊस कणकुंबी भागात होत असतो. यावर्षी दि. 19 ऑगस्टपर्यंत एकूण 4858.8 मि. मी. पावसाची नोंद झाली आहे. कणकुंबी पाणलोट क्षेत्रात झालेल्या संततधार पावसामुळे या भागातील सर्व धबधबे ओसंडून वाहत आहेत. मागील दोन्ही मृग आणि आर्द्रा नक्षत्रात 1965.6 मि. मी. तर मे महिन्यात म्हणजे मान्सूनपूर्व 531.8 मि. मी. पाऊस झाला आहे. यावर्षी मे महिन्यात 531.8 मि. मी., जून महिन्यात 1581.8 तर जुलै महिन्यात 1987 मि. मी. पाऊस झाला आहे.
कणकुंबी भागात विशेषत: मे महिन्यात पहिल्यांदाच 531.8 मि. मी. पाऊस झाला आहे. दि. 23 मे रोजी 107 मि. मी. व 24 मे रोजी 125.2 मि. मी. पाऊस झाला आहे. यापूर्वी मे महिन्यात एवढ्या प्रमाणात पाऊस अलीकडच्या काही वर्षांत तरी झाला नाही. मागीलवर्षी जून महिन्यात केवळ 814.2 मि. मी. पाऊस झाला होता. यावर्षी मात्र जून महिन्यात 1581.8 मि. मी. पाऊस झाला आहे. गेल्या चार-पाच वर्षांच्या तुलनेत यावर्षी जून महिन्यात अधिक पाऊस झाला आहे. तसेच यावर्षी अद्याप झालेल्या पावसापैकी दि. 15 जून सकाळी 7 ते दि. 16 जून रोजी सकाळी 7 वाजेपर्यंत झालेल्या चोवीस तासात 186.2 मि. मी. हा या वर्षातील सर्वाधिक पाऊस झाला आहे. काही ठिकाणी वादळी वाऱ्यासह झालेल्या संततधार पावसामुळे झाडे उन्मळून पडली आहेत.
