अनुराग वाजपेयीला सामनावीर पुरस्कार
बेळगाव : कर्नाटक राज्य क्रिकेट संघटना मान्यताप्राप्त धारवाड विभागीय क्रिकेट संघटना आयोजित केएससीए थर्ड डिव्हीजन क्रिकेट स्पर्धेच्या अंतिम सामन्यात श्री सिद्धारूढ स्वामी स्पोर्ट्स क्लब अ हुबळी संघांचा 9 गड्यांनी पराभव करून केएससीए थर्ड डिव्हीजन चषक पटकाविला. अष्टपैलू कामगिरी करणाऱ्या अनुराग वाजपेयी याला सामनावीर पुरस्कार देण्यात आला. ऑटोनगर येथील केएससीए बेळगाव मैदानावर झालेल्या अंतिम सामन्यात श्री सिद्धारूढ स्वामी स्पोर्ट्स क्लब अ संघाने प्रथम फलंदाजी करताना 24.4 षटकात सर्वगडी बाद 116 धावा केल्या. त्यात चंद्रहास आचार्यने 5 चौकारांसह 30, धीरज नाईकने 2 षटकार 1 चौकारांसह 19, प्रणव एसडीने 3 चौकारांसह 14, प्रकाश एलबीने 2 चौकारांसह 12, अभिषेक देशपांडेने 2 चौकारांसह 12 तर विनायक बेजवाडने 10 धावा केल्या.
केआर शेट्टीतर्फे अनुराग वाजपेयीने 25 धावात 5 गडी बाद करीत निम्मा संघ गारद केला. किरण तरळेकरने 17 धावात 3, साहील शर्मा व आदी नलवडे यांनी प्रत्येकी 1 गडी बाद केला. प्रत्युत्तरादाखल खेळताना केआर शेट्टी लायाजने 14.3 षटकात 1 गडी बाद 117 धावा करून सामना 9 गड्यांनी जिंकला. त्यात साहील शर्माने 2 षटकार 5 चौकारांसह 46, शुभम खोतने 6 चौकारांसह नाबाद 35 तर आदित्य वारंगने 1 षटकार 4 चौकारांसह नाबाद 27 धावा केल्या. सिद्धारूढतर्फे प्रणव एसडीने 1 गडी बाद केला. सामन्यानंतर संघमालक प्रणय शेट्टी, पुनीत शेट्टी, प्रशांत लायंदर, वासिम धामणेकर यांनी संघाचे कौतुक केले.
