चिपळूण / प्रतिनिधी :
चिपळूण तालुक्यातील सावर्डे-डेरवण मार्गावरील मातोश्री इमारतीत असलेले ज्वेलर्सचे दुकान फोडून रोख रक्कमेसह दागिने असा 9 लाख 14 हजार रूपये किंमतीचा ऐवज चोरुन नेल्याची घटना उघडकीस आली. या दरम्यान चोरट्याने सीसीटीव्ही कॅमेऱ्याचा डीव्हीआरही चोरुन नेला आहे. या प्रकरणी सावर्डे पोलीस स्थानकात अज्ञात चोरट्यावर गुन्हा दाखल करण्यात आला आहे.
डेरवण ते सावर्डे मार्गावरील गंगाराम सदाशिव जोशी यांच्या मालकीच्या मातोश्री या इमारतीत तळमजल्यावरील गाळा क. 4 मध्ये शिरोडकर स्टोअर्स आहे. 17 व 18 मे रोजी या कालावधीत या दुकानाबाहेरील सीसीटीव्ही कॅमेरा चोरट्याने तोडून नुकसान केले. त्यानंतर त्या दुकानालगत असलेल्या गाळा क्रमांक. 3 मधील अलंकार ज्वेलर्स या दुकानाला लक्ष्य केले. या दुकानासमोरील लोखंडी शटरला लावलेल्या दोन्ही कुलुपांच्या लोखंडी पट्ट्या कोणत्यातरी हत्याराने कापून चोरट्याने शटर उघडले. नंतर ज्वेअर्स दुकानात प्रवेश करुन चोरट्याने दुकानातील काऊंटर टेबलावरील शोकेसमध्ये ठेवलेले सोन्या व चांदीचे दागिने व रोख रक्कम असा 9 लाख 14 हजार रूपये किंमतीचा ऐवज चोरुन नेला.
दरम्यान, ही चोरी करतेवेळी तसेच सीसीटीव्ही कॅमेऱ्याच्या डीव्हीआरच्या वायर तोडून नुकसान करुन डीव्हीआर चोरुन नेला. हा प्रकार ज्वेलर्स मालकाच्या लक्षात आल्यानंतर त्यांनी सावर्डे पोलीस स्थानकात तकार दिली. त्यानुसार पोलिसांनी अज्ञात चोरट्यावर गुन्हा दाखल केला आहे.
