मी नेहमीच शरद पवारांच्या मागे आहे अशी भुमिका घेतलेल्या राष्ट्रवादी काँग्रेस पार्टीच्या शरद पवार गटाचे प्रदेशाध्यक्ष जयंत पाटील हे भाजपच्या वाटेवर असल्याच्या चर्चा माध्यमांमध्ये रंगू लागल्यावर महाराष्ट्राच्या दौऱ्यावर असलेल्या भाजपचे जेष्ठ नेते आणि केंद्रीय सहकारमंत्री अमित शहा यांची भेट जयंत पाटीलांनी घेतली असल्य़ाच्या बातम्याही माध्यमांवर फिरत आहेत. तर मी कोणाचीही भेट घेतली नसून या सर्व अफवा आहेत. यातून माझीच करमणूक होत असल्याचे जयंत पाटील यांनी प्रतिक्रिया दिली आहे.
जयंत पाटील यांना भाजपकडून ऑफर असून ते महायुतीच्या वाटेवर असल्याच्या बातम्या सर्व माध्यमांमध्ये फिरत आहेत. त्यातच महाराष्ट्र दौऱ्यावर असलेल्या केंद्रिय गृहमंत्री अमित शहा यांनी आपल्या पुणे दौऱ्यात जयंत पाटील यांची भेट घेतली असल्याचेही सांगितले जात होते.
या सर्व घडामोडींनंतर जयंत पाटलांनी माध्यमांना प्रतिक्रीया दिली असून आपली अमित शाहांशी भेट झाली नसल्याचे त्यांनी स्पष्टीकरण दिले आहे. तुम्हाला भाजपाने ऑफर दिली आहे का? या माध्यमांनी विचारलेल्या प्रश्नावर उत्तर देताना जयंत पाटील म्हणाले, “मला कुणाचीही ऑफर नाही…माझी कुणाशीही चर्चा झाली नाही….मी शरद पवारांना रोज भेटत आहे….आमचे विधानसभेचे आणि विधान परिषदेचे सदस्यही शरद पवारांची भेट घेत असतात. पण कालपासून मी महायुतीत जाणार असल्याच्या बातम्या सुरू झाल्या आहेत. त्या बातम्या मोबाईलवरही येत आहेत, यामुळे माझीही करमणूक होत आहे. या करमणूकीत आज सकाळी भर पडली. त्यानंतर दुपारी आणखी भर पडली. ही करमणूक महाराष्ट्रातील जनतेमध्ये माझ्याबद्दल गैरसमज पसरवणारी आहे. मी काल शरद पवारांकडे होतो. त्यानंतर रात्री माझ्या घरी काही आमदार आले होते. त्यांच्याशी विविध प्रश्नांवर चर्चा झाली…आज सकाळी पुन्हा मी शरद पवारांना भेटायला गेलो होतो…त्यामुळे कुणीही गैरसमज पसरवणं योग्य नाही.” असेही ते म्हणाले.
