तेलंगणात भाजपसोबत आघाडी करणार जनसेना

हैदराबाद : तेलंगणात भाजप आणि जनसेना पक्षादरम्यान निवडणूकपूर्व आघाडीची चर्चा पुढे नेत पवन कल्याण यांनी दिल्लीत केंद्रीय गृहमंत्री अमित शाह यांची भेट घेतली आहे. तेलंगणात विधानसभा निवडणुकीसाठी 30 नोव्हेंबर रोजी मतदान होणार आहे. जनसेनेच्या राजकीय विषयक समितीचे अध्यक्ष मनोहर यांच्यासोबत पक्षाचे प्रमुख पवन कल्याण यांनी शाह यांची भेट घेतली आहे. शाह यांनी यावेळी तेलंगणातील भाजप नेतृत्व आणि पवन कल्याण यांना एका सहमतीवर पोहोचण्याची सूचना केली आहे. शाह हे शुक्रवारी सरदार वल्लभभाई पटेल राष्ट्रीय पोलीस अकॅडमीमध्ये आयोजित होणाऱ्या पासिंग आउट परेडची समीक्षा करणार आहेत. तसेच शुक्रवारी दुपारी प्रचारसभेला संबोधित करणार आहेत. कुठल्याही निष्कर्षावर पोहोचण्यापूर्वी पवन कल्याण हे तेलंगणातील जनसेनेच्या नेत्यांसोबत चर्चा करणार आहेत.