‘स्कॅम 2003’च्या प्रदर्शनाचा मुहूर्त ठरला

‘स्कॅम 1992 : द हर्षद मेहता की स्टोरी’नंतर हंसल मेहता हे आणखी एका घोटाळ्याची कहाणी लवकरच ओटीटी प्लॅटफॉर्मवर सादर करणार आहेत. द तेलगी स्टोरी’च्या स्कॅमच्या कहाणीची चाहते आतुरतेने प्रतीक्षा करत आहेत. मेहतांची यांची स्कूप ही सीरिज अलिकडेच नेटफ्लिक्सवर प्रदर्शित झाली होती. या सीरिजलाही मोठा प्रतिसाद मिळाला आहे. स्कूपनंतर मेहता यांनी स्वत:ची आगामी सीरिज ‘स्कॅम 2003’च्या प्रदर्शनाची तारीख जाहीर केली आहे. सोनी लिव्हच्या युट्यूब चॅनेलवर मेहता यांनी एक छोटा टीझर सादर केला असून यात त्यांनी दोन वर्षांनी पुन्हा एकदा मोठ्या स्कॅमचा खुलासा करणार असल्याचे म्हटले आहे. स्कॅम 2003 द तेलगी स्टोरी ही सीरिज सोनी लिव्हवर 2 सप्टेंबर रोजी प्रदर्शित होणार आहे. स्कॅम 2003 : द तेलगी स्टोरी ही सीरिज देशाला हादरवून सोडणाऱ्या स्टॅम्प घोटाळ्यावर आधारित आहे. 2003 मध्ये झालेल्या या मोठ्या घोटाळ्याचा सूत्रधार अब्दुल करीम तेलगी होता. हंसल मेहता यांची ही सीरिज पत्रकार संजय सिंह यांचे पुस्तक ‘रिपोर्टर की डायरी’वर आधारित आहे. स्टॅम्प घोटाळ्यामुळे भारतीय अर्थव्यवस्थेला सुमारे 32 हजार कोटी रुपयांचा फटका बसला होता. या सीरिजमध्ये तेलगीची व्यक्तिरेखा गगन देव रियार साकारत आहे.