बरगाव ग्रा.पं.मधील भ्रष्टाचाराची जि.पं.अधिकाऱ्यांकडून चौकशी

खानापूर : बरगाव ग्राम पंचायतीत बनावट पावती बुकद्वारे भ्रष्टाचार झाल्याची तक्रार पद्मश्री पाटील यांनी लोकायुक्तांकडे केली होती. लोकायुक्त अधिकाऱ्यांनी जिल्हा पंचायतीच्या वरिष्ठ अधिकाऱ्यांना चौकशी करून अहवाल देण्याचे निर्देश दिले होते. त्यामुळे जिल्हा पंचायतीचे डी. एस. बसवराज हेग्गनायक यांनी या भ्रष्टाचाऱ्याची खानापूर तालुका पंचायत कार्यालयात चौकशी केली. बरगाव ग्राम पंचायतीच्या सदस्या पद्मश्री पाटील यांनी ग्राम पंचायतीत बनावट पावती पुस्तके छापून मोठ्या प्रमाणात भ्रष्टाचार झाल्याची तक्रार तालुका पंचायत अधिकाऱ्यांकडे केली होती. तत्कालीन तालुका पंचायत अधिकाऱ्यांनी याबाबत चौकशी केली. मात्र चौकशी योग्य झाली नसल्याने पद्मश्री पाटील यांनी लोकायुक्तांकडे तक्रार दाखल केली होती. लोकायुक्त अधिकाऱ्यांनी याची दखल घेत जिल्हा पंचायतीच्या वरिष्ठ अधिकाऱ्यांना चौकशी करण्याचे निर्देश दिले होते.बसवराज हेग्गनायक यांनी तालुका पंचायत कार्यालयात चौकशी केली. यावेळी तत्कालीन बरगाव ग्रा. पं. पीडीओ व इतर कर्मचाऱ्यांची तसेच कागदपत्रांची पडताळणी करून अहवाल तयार केला आहे, अशी माहिती ग्रा. पं. सदस्या पद्मश्री पाटील यांनी दिली.