विमानतळ अधिकाऱ्यांकडून विस्तारीकरणासाठी पाहणी

बेळगाव : बेळगाव विमानतळाच्या विस्तारीकरणासाठी हालचाली सुरू झाल्या आहेत. भविष्यात विमानसेवेला महत्त्व वाढणार असल्याने त्यादृष्टीने आतापासूनच पावले उचलली जात आहेत. विमानतळ प्राधिकरणाच्या अधिकाऱ्यांनी नुकतीच संपूर्ण विमानतळाची पाहणी करून एक आढावा अहवाल तयार केला आहे. विमानतळ विस्तारीकरण होणार असल्याने अत्याधुनिक सेवा याठिकाणी दिल्या जाणार आहेत. प्रवासी वाहतुकीसोबतच कार्गो वाहतूक वाढविण्याकडे विमानतळ प्राधिकरणाचा प्रयत्न आहे. महिन्याभरापूर्वी केंद्रीय विमानतळ प्राधिकरणाकडून बेळगावला मोठा निधी मंजूर झाला आहे. नवीन टर्मिनल बिल्डिंगसह अनेक सुविधा बेळगावमध्ये उपलब्ध होण्याची शक्यता आहे. अतिरिक्त जागेची मागणीही जोर धरू लागली आहे. त्यामुळे विमानतळ प्राधिकरणाच्या अधिकाऱ्यांनी विमानतळाची पाहणी केली. बेळगावमधील विमानसेवा जरी कमी झाल्या असल्या तरी त्या मानाने प्रवासी संख्या उत्तम आहे. बेळगावमधून सध्या देशातील महत्त्वाच्या शहरांना विमानसेवा सुरू असल्याने प्रवाशांचा चांगला ओढा आहे. भविष्यात मोठी विमाने उतरण्याची शक्यता असल्याने त्यादृष्टीने प्रयत्न केले जात आहेत. विस्तारीकरण करण्यासाठी आवश्यक त्या सर्व बाबी विमानतळ प्राधिकरणाकडून पूर्ण केल्या जातात. विमानतळ संचालकांसह इतर अधिकाऱ्यांनी नुकतीच पाहणी केली.