कोल्हापूर :
इतिहास संशोधक इंद्रजित सावंत यांना धमकी दिल्याप्रकरणी गुरुवारी जुना राजवाडा पोलिसांनी इंद्रजित सावंत यांचा मोबाईल ताब्यात घेतला. या मोबाईलमधील सर्व माहिती पोलिस ताब्यात घेणार आहेत. तसेच छत्रपती शिवाजी महाराज आणि संभाजी महाराजांबद्दल आक्षेपार्ह वक्तव्य करणाऱ्या प्रशांत कोरटकर याला कधी अटक करणार? असा सवाल शिवप्रेमींनी जुना राजवाडा पोलिसांना विचारला.
इतिहास संशोधक इंद्रजित सावंत यांना सोमवारी मध्यरात्रीच्या सुमारास फोन करुन जीवे ठार मारण्याची धमकी देण्यात आली. तसेच छत्रपती शिवाजी महाराज आणि संभाजी महाराजांबद्दल आक्षेपार्ह वक्तव्य केल्याची ऑडीओ क्लिप सोशल मीडियावर व्हायरल झाली. खुद्द मुख्यमंत्री देवेंद्र फडणवीस यांनीही कोरटकरला अटक करण्याच्या सूचना पोलिसांना केल्या. यानंतर मंगळवारी जुना राजवाडा पोलीस ठाण्यात प्रशांत कोरटकर याच्यावर गुन्हा दाखल करण्यात आला. बुधवारी जुना राजवाडा पोलिसांचे पथक कोरटकर याच्या अटकेसाठी नागपूरला रवाना झाले. त्यानंतरही गेल्या चार दिवसांपासून कोरटकर पसार आहे.
कोरटकरच्या मोबाईल लोकेशनवरून जुना राजवाडा पोलीस ठाण्याचे एक पथक त्याचा शोध घेत आहे. कोरटकरचे शेवटचे लोकेशन नागपुरातील दीक्षाभूमी परिसरात आढळले आहे. त्यानंतर त्याचा मोबाइल बंदच असल्याचे पोलिसांनी सांगितले. त्याचे नातेवाईक आणि मित्रांकडे चौकशी सुरू करण्यात आली आहे. कोरटकरचे कुटुंबियांकडेही चौकशी करण्यात येणार आहे. मात्र कोरटकरचे घर बंद आढळून आले आहे. इंदोर आणि पुसद येथे तो गेल्याच्या चर्चा गुरुवारी दिवसभर सुरू होत्या.
- कोरटकरला त्वरित अटक करा
इंद्रजित सावंत यांनी गुरुवारी तपासकामी त्यांचा मोबाइल जुना राजवाडा पोलिसांकडे सादर केला. कोरटकर याला तातडीने अटक झाली नाही तर तो पुरावे नष्ट करू शकतो. पुराव्यांशी छेडछाड करू शकतो. त्यामुळे त्याला त्वरित अटक करावी, अशी मागणी सावंत यांनी केली. यावेळी पोलिसांनी कोरटकर आणि इंद्रजित सावंत यांच्यामधील संभाषण जबाब स्वरुपात नोंदवून घेतले. तसेच सावंत यांचे सिमकार्ड त्यांना परत दिले असून, मोबाईलमधील सर्व डेटा कॉपी करण्यात येणार आहे. यावेळी हर्षल सुर्वे, चंद्रकांत यादव, दत्ता टिपुगडे, अवधूत साळोखे, संपत चव्हाण, किशोर खानविलकर, वैशाली महाडिक, पूजा आरडे, प्रतिज्ञा उत्तुरे, चंद्रकांत पाटील यांच्यासह शिवप्रेमी उपस्थित होते.
