भारताने इराणला 84 गुणांनी लोळवले : भारताची प्रियंका इंगळे सामन्यातील सर्वोत्तम खेळाडू
वृत्तसंस्था/ नवी दिल्ली
इंदिरा गांधी इनडोअर स्टेडियममध्ये सुरु असलेल्या खो-खो विश्वचषक 2025 मध्ये भारतीय महिला संघाने कालचा अध्याय आज पुढे चालू ठेवत इराणला अक्षरश: लोळवले. दक्षिण कोरियाविरुद्धच्या ऐतिहासिक 175-18 अशा विजयानंतर, भारतीय महिला खो-खो संघाने इराणला 84 गुणांनी पराभूत करत उपांत्यपूर्व फेरीत आपले स्थान निश्चित केले.
या सामन्यात भारतीय खो-खो खेळाडूंनी इराणच्या खेळाडूंना पळताभुई थोडे केले. यापूर्वी भारताने मध्यंतराला 52-10 अशी घसघशीत आघाडी घेत विजयी घोडदौड कुठेही थांबणार नाही याची काळजी घेतली. सामन्याची सुरुवात भारतीय संघाच्या नेहमीच्या आक्रमक शैलीने झाली. पहिल्या टर्नमध्ये त्यांनी इराणच्या पहिल्या बॅचला अवघ्या 33 सेकंदांत बाद केले. अश्विनीने आघाडी घेत संघासाठी सुरुवातीलाच गुण मिळवले, तर मीनूने आपला शानदार फॉर्म कायम राखत अनेक सहज स्पर्शाने गुण मिळवले. पहिल्या टर्नमध्येच भारतीय संघाने 50 गुणांची कमाई केली.
सामना पुढेही एकतर्फी राहिला. तिसऱ्या टर्नच्या शेवटी भारताचे 93 गुण झाले होते व शेवटच्या टर्न मध्ये 7 ड्रीम रन वसूल करत भारताने गुणांची शंभरी गाठली. वझीर निर्मलाच्या डावपेचांच्या कौशल्याने आणि कर्णधार प्रियांका इंगळे, निर्मला भाटी आणि नसरीन यांच्या योगदानामुळे भारताने आणखी एक प्रभावी व मोठा विजय साजरा केला. या विजयामुळे भारताने या स्पर्धेतील विजेतेपदाचा प्रबळ दावेदार संघ म्हणून स्वत:ला सिद्ध केले आहे.
सामन्यातील पुरस्कार:
सर्वोत्कृष्ट आक्रमक खेळाडू : मोबिना (इराण)
सर्वोत्कृष्ट बचावपटू : मीनू (भारत)
सामन्याची उत्कृष्ट खेळाडू : प्रियांका इंगळे (कर्णधार भारत)
केनियाची ऑस्ट्रेलियावर निसटती मात
पुरुष गटातील एका चुरशीच्या सामन्यात केनियाने ऑस्ट्रेलियावर 58-54 अशी मात केली. मध्यंतरास ऑस्ट्रेलियाने केनियावर 28-26 असे निसटती आघाडी घेतली होती. त्यानंतर मात्र केनियाने बहारदार खेळी करीत संघाचा विजय खेचून आणला. किनियाचा मोसेस अटेन्या (1.23 मि. संरक्षण व 14 गुण ) याने अष्टपैलू खेळी केली. ऑस्ट्रेलियाचा मंगेश जगताप आक्रमक पुरस्काराचा मानकरी ठरला. त्याने यात 12 गडी टिपले. सकाळी झालेल्या सामन्यात मंगेशने जर्मनी विरुद्धही आक्रमकचा पुरस्कार आणि काल झालेल्या इंग्लंडविरुद्धच्या सामन्यात अष्टपैलू खेळाडूचा मान मिळविला होता.
