स्पेनमध्ये पोहोचले वायुदल प्रमुख : 56 पैकी 16 विमाने रेडी टू-फ्लाय स्थितीत येणार : अन्य विमानांची टाटा कंपनीकडून निर्मिती
वृत्तसंस्था/ माद्रिद
भारताला स्वत:चे पहिले सी-295 टॅक्टिकल सैन्य एअरलिफ्ट विमान आज मिळणार आहे. हे विमान भारतात आणण्यासाठी वायुदलाचे प्रमुख व्ही. आर. चौधरी हे स्पेनमध्ये पोहोचले आहेत. सी-295 विमान स्पेनच्या सेविले प्रकल्पात निर्माण करण्यात येत आहे. वायुदलात याचा समावेश चालू महिन्यात हिंडन वायुतळावर होणार आहे. तर याप्रकारातील दुसरे विमान मे महिन्यापर्यंत प्राप्त होणार आहे. पहिल्या सी-295 ट्रान्सपोर्ट एअरक्राफ्टला आगरा वायुतळावर तैनात केले जाणार आहे. या विमानासाठीच्या वैमानिकांचे प्रशिक्षण केंद्र देखील तेथेच स्थापन करण्यात येणार आहे.
भारताने सप्टेंबर 2021 मध्ये युरोपीय कंपनी एअरबस डिफेन्स अँड स्पेससोबत सी-295 ट्रान्सपोर्ट एअरक्राफ्ट्ससाठी 21 हजार कोटी रुपयांचा करार केला होता. यानुसार 56 विमानांची मागणी करण्यात आली होती. यातील 16 विमाने ही रेडी टू फ्लाय स्थितीत स्पेनमधून भारतात दाखल होणार आहेत. उर्वरित 40 विमानांची निर्मिती गुजरातच्या वडोदरामध्ये टाटा अॅडव्हान्स सिस्टीम कंपनीकडून केली जाणार आहे.
पुढील वर्षापासून भारतात निर्मिती
टाटा अॅडव्हान्स सिस्टीम लिमिटेड वडोदार येथे 2024 च्या मध्यापर्यंत सी-295 विमानांच्या निर्मितीस प्रारंभ करणार आहे. सध्या याच्या प्रकल्पाचे काम सुरू आहे. पहिले स्वदेशी सी-295 विमान 2026 मध्ये तयार होणार आहे. फायनल असेम्बलिंग करण्यासाठी एअरबस आणि टाटाच्या हैदराबाद व नागपूर प्रकल्पात 14 हजारांपेक्षा अधिक स्वदेशी सुटे भाग तयार करून वडोदरा येथे पाठविले जाणार आहेत. कंपनी 2031 पर्यंत वायुदलाला सर्व 40 विमाने सोपविणार आहे.
नौदल अन् तटरक्षक दलही इच्छुक
वायुदलासोबत नौदल तसेच तटरक्षक दल देखील 15-16 विमाने खरेदी करू शकते. सध्या यासंबंधी बोलणी सुरू आहे. नौदलासाठी 10 विमाने किनारी टेहळणी आणि गस्तकार्यासाठी तयार केली जाणार आहेत. तर तटरक्षक दल देखील 6 विमानांद्वारे टेहळणी अन् ट्रुपर्स मूव्हमेंट करणार आहे. बीएसएफ देखील सी-295 विमाने खरेदी करण्याच्या तयारीत आहे. सुमारे 3 सुरक्षा यंत्रणा देखील या विमानांच्या खरेदीसाठी इच्छुक आहेत. 6 वैमानिक आणि 10 इंजिनियर्सच्या पथकाने सेव्हिलेमध्ये या विमानाच्या हाताळणीशी निगडित प्रशिक्षण पूर्ण केले आहे.
एअरक्राफ्ट सी-295 ची वैशिष्ट्यो
-हे विमान शॉर्ट टेक-ऑफ आणि लँडिंग करू शकते. कंपनीनसार हे विमान 320 मीटर अंतरातच टेकऑफ करू शकते. तर लँडिंगसाठी 670 मीटरची लांबी पुरेशी आहे.
-लडाख, काश्मीर, आसाम आणि सिक्कीम यासारख्या पर्वतीय भागांमध्ये हे विमान विविध मोहिमेसाठी सहाय्यभूत ठरणार आहे.
-हे विमान 7,050 किलोग्रॅमचे वजन वाहून नेऊ शकते. तसेच एकाचवेळी 71 सैनिक, 44 पॅराट्रुपर्स, 24 स्ट्रेचर किंवा 5 कार्गो पॅलेटची वाहतूक करू शकते.
-हे विमान सलग 11 तासांपर्यंत उ•ाण करू शकते. 2 जणांच्या क्रू केबिनमध्ये टचस्क्रीन कंट्रोलसोबत स्मार्ट कंट्रोल सिस्टीम देखील आहे.
-सी-295 एमडब्ल्यू ट्रान्सपोर्ट एअरक्राफ्टमध्ये मागे रॅम्प डोअर असून तो सैनिक किंवा सामग्रीच्या जलद लोडिंग अन् ड्रॉपिंगसाठी आहे.
-विमानात 2 प्रॅट अँड व्हिटनी पीडब्ल्यू127 टर्बोट्रुप इंजिन्स असून या सर्व विमानांना स्वदेशनिर्मित इलेक्ट्रॉनिक वॉरफेयर सुइटने युक्त केले जाईल.
भारतीय वायुदल का खरेदी करतेय?
भारतीय वायुदलात सी-295 विमान एवरो एअरक्राफ्टची जागा घेणार आहे. वायुदलात 60 वर्षांपूर्वी खरेदी करण्यात आलेली 56 एवरो ट्रान्सपोर्ट एअरक्राफ्ट्स आहेत. अनेक वर्षांपासून या विमानांना बदलण्याची मागणी होत आहे. मे 2013 मध्ये कंपन्यांना रिक्वेस्ट फॉर प्रपोजल पाठविण्यात आला होता. मे 2015 मध्ये संरक्षण खरेदी परिषदेने टाटा समूह आणि एअरबसच्या सी-295 एअरक्राफ्टच्या निविदेला मंजुरी दिली होती. 40 विमानांची भारतात निर्मिती करण्यात येणार असल्याने 15 हजार उच्चकुशल नोकऱ्या निर्माण होणार असल्याचा दावा आहे. याचबरोबर 10 हजार जणांना थेट रोजगार मिळणार आहे.
