व्यक्तिगतसह संस्था आणि ट्रस्टचा समावेश
वृत्तसंस्था/ नवी दिल्ली
माहितीच्या वार्षिक स्वयंचलित देवाणघेवाण अंतर्गत भारताला स्विस बँक खात्याच्या तपशीलांचा एक नवीन संच प्राप्त झाला आहे. स्वित्झर्लंडने सुमारे 36 लाख बँक खात्यांचे तपशील 104 देशांसोबत शेअर केले आहेत. स्वित्झर्लंड आणि भारत यांच्यातील माहितीची ही पाचवी वार्षिक देवाण-घेवाण आहे. भारतीय अधिकाऱ्यांसोबत शेअर केलेले नवीन तपशील शेकडो बँक खात्यांशी संबंधित आहेत. यामध्ये काही व्यक्ती, कॉर्पोरेट्स आणि ट्रस्टशी संबंधित असल्याची माहिती अधिकाऱ्यांनी दिली.
स्वित्झर्लंडने शेअर केलेल्या तपशीलांमध्ये नाव, पत्ता, राहण्याचे ठिकाण आणि कर ओळख क्रमांक यासह खाते क्रमांक आणि आर्थिक माहिती समाविष्ट आहे. यासोबतच आर्थिक अहवाल, खात्यातील शिल्लक आणि भांडवली उत्पन्नाशी संबंधित माहितीही शेअर करण्यात आली आहे. ही देवाण-घेवाण गेल्या महिन्यात झाली असून पुढील माहितीचा संच स्वित्झर्लंड सप्टेंबर 2024 मध्ये शेअर करेल. देवाण-घेवाण केलेली ही माहिती कर अधिकाऱ्यांना करदात्यांनी त्यांच्या कर रिटर्नमध्ये योग्य माहिती दिल्याची शहानिशा करण्यास अनुमती देते. तथापि, स्वित्झर्लंडने पुरविलेली ही माहिती जाहीरपणे प्रसिद्ध केली जाणार नाही.
