India open their T20 World Cup campaign against Pakistan

महिला आयसीसी टी 20 वर्ल्डकप 2026 चे वेळापत्रक जाहीर : 12 जूनपासून इंग्लंडमध्ये स्पर्धेला प्रारंभ

वृत्तसंस्था/ लंडन

आयसीसीने 2026 मध्ये होणाऱ्या महिला टी-20 वर्ल्डकप स्पर्धेचे वेळापत्रक जाहीर केले आहे. या स्पर्धेचे यजमानपद इंग्लंडकडे असणार आहे. स्पर्धेतील सलामीचा सामना इंग्लंड व श्रीलंका या दोन्ही संघांमध्ये रंगणार आहे. हा सामना 12 जून रोजी खेळवला जाईल. नुकताच आयसीसीकडून महिला वनडे वर्ल्डकप 2025 स्पर्धेच्या वेळापत्रकाची घोषणा करण्यात आली होती. 5 ऑक्टोबरला भारत आणि पाकिस्तान हे दोन्ही संघ भिडणार आहेत. या सामन्यानंतर क्रिकेट चाहत्यांना पुन्हा एकदा भारत-पाकिस्तान सामना पाहण्याची संधी मिळणार आहे. विशेष म्हणजे भारत आणि पाकला पुन्हा एकाच गटात स्थान देण्यात आले असून ही लढत 14 जून रोजी होईल.

आयसीसीने सोमवारी या स्पर्धेचे वेळापत्रक जाहीर केले असून या स्पर्धेची सुरुवात 12 जूनपासून होणार आहे. स्पर्धेत एकूण 12 संघ भाग घेणार असून दोन गट करण्यात आले आहेत. गट 1 मध्ये ऑस्ट्रेलिया, दक्षिण अफ्रिकेसह भारत पाकिस्तान संघ आहेत. तसेच इतर दोन संघ पात्रता फेरीतून या वर्षभरात निश्चित होतील. तर गट 2 मध्ये इंग्लंड, न्यूझीलंड, श्रीलंका आणि वेस्ट इंडिज हे संघ असतील. तर इतर दोन संघ पात्रता फेरीतून ठरतील. नियमानुसार प्रत्येक संघ साखळी फेरीत पाच सामने खेळेल आणि गटात टॉपला असलेल्या दोन संघांना उपांत्य फेरीचे तिकीट मिळेल. हे सामने 30 जून आणि 2 जुलै रोजी खेळवला जाईल. तर स्पर्धेतील अंतिम सामना 5 जुलैला लॉर्ड्सच्या मैदानावर खेळवला जाणार आहे. या स्पर्धेतील सामने द ओव्हल, ब्रिस्टॉल काऊंटी ग्राऊंड, एजबॅस्टन, हॅम्पशायर बाऊल, हेडिंग्ले आणि लॉर्ड्सच्या मैदानावर रंगणार आहेत.

14 जूनला भारत-पाक आमनेसामने

भारत आणि पाकिस्तान त्यांच्या मोहिमेची सुरुवात एजबॅस्टन येथेच करतील. वनडे वर्ल्डकपनंतर हे दोन्ही संघ पुन्हा टी 20 वर्ल्डकपमध्ये 14 जूनला आमनेसामने येतील. या हायव्होल्टेज लढतीची चाहत्यांना आतापासून उत्सुकता लागली आहे. पाकिस्तानविरुद्धच्या पहिल्या सामन्यानंतर, भारत 17 जून रोजी पात्रता संघाविरुद्धच्या सामन्यासाठी हेडिंग्लेला जाईल आणि त्यानंतर 21 जून रोजी ओल्ड ट्रॅफर्ड येथे दक्षिण आफ्रिकेचा सामना करेल. भारत 25 जून रोजी ओल्ड ट्रॅफर्ड येथे गट अ मधील दुसऱ्या पात्रता संघाचा सामना करेल, तर 28 जून रोजी भारत ऑस्ट्रेलियाचा सामना करेल.

आयसीसी महिला टी 20 वर्ल्डकप 2026 चे वेळापत्रक