सरकारच्या विकासकामांच्या माहिती प्रदर्शनाचे उद्घाटन

बेळगाव : राज्य सरकारला दोन वर्षे पूर्ण झाली आहेत. यानिमित्त माहिती व जनसंपर्क विभागाच्यावतीने ‘साधना संभ्रम’ मोहीमअंतर्गत सरकारच्या विविध विकासकामांच्या माहिती प्रदर्शनाचे आयोजन करण्यात आले आहे. याचे उद्घाटन पालकमंत्री सतीश जारकीहोळी यांच्या हस्ते करण्यात आले. सदर प्रदर्शन बेळगाव मध्यवर्ती बसस्थानकात सुरू असून सार्वजनिकांसाठी खुले असणार आहे. यावेळी बोलताना जारकीहोळी म्हणाले, सरकारच्या हमी योजनांसह विविध विकासकामांबाबत सार्वजनिकांना माहिती व्हावी, या उद्देशाने राज्यातील महापालिका व्याप्तीत माहिती प्रदर्शनाचे आयोजन करण्यात आले आहे. हमी व इतर विकासकामांसाठी राज्य सरकारने मोठा निधी उपलब्ध केला आहे. याची सर्वांना माहिती असणे आवश्यक असून प्रत्येक जिल्ह्याच्या पालकमंत्र्यांनी याला चालना दिली आहे. हे प्रदर्शन 10 जूनपर्यंत असून विनाशुल्क असणार आहे, असे त्यांनी सांगितले. यावेळी आमदार राजू सेठ, माहिती व जनसंपर्क खात्याचे उपसंचालक गुरुनाथ कडबूर, परिवहन मंडळाचे विभागीय नियंत्रक राजेश हुद्दारी यांच्यासह इतर अधिकारी उपस्थित होते.