खानापुरात गृहज्योती योजनेचा शुभारंभ

खानापूर : कर्नाटक सरकारच्या गॅरंटीची पूर्तता करण्यासाठी प्रत्येक घराला दोनशे युनिट मोफत वीज देण्याच्या घोषणेची पूर्तता करण्यासाठी गृहज्योती योजना जाहीर केली होती. याची पूर्तता करण्यासाठी सेवासिंधू पोर्टलचे उद्घाटन करण्यात आले आहे. 18 जूनपासून या योजनेचा लाभ मिळवण्यासाठी सेवासिंधू पोर्टलवर मिटरधारकांनी आपले आधार कार्ड, लाईट बिल आणि मोबाईल नंबर लिंक करावयाचे आहे. त्यानंतर जुलैपासून या योजनेचा लाभ मिळणार आहे. त्याचबरोबर घरमालक अथवा भाडेकरू यांना सेवासिंधू पोर्टलवर त्यांचे आधारकार्ड लिंक करून गृहज्योती योजनेची सुविधा मिळू शकते, अशी माहिती हेस्कॉमच्या कार्यकारी अभियंत्या कल्पना तिरवीर यांनी रविवारी खानापूर हेस्कॉम कार्यालयात गृहज्योती योजनेच्या नोंदणी कार्यक्रमात बोलताना दिली. गृहज्योती योजनेच्या नोंदणीसाठी नेट सेंटर किंवा वीज कार्यालयात जाण्याची गरज नाही. घरबसल्या मोबाईल किंवा लॅपटॉपवर नोंदणी करता येते. या व्यतिरिक्त  कोणत्याही वीज कार्यालयात नोंदणी करता येते. प्रारंभी हेस्कॉमचे अकौटंट नमित इजारी यांनी प्रास्ताविक करून उपस्थितांचे स्वागत केले. यावेळी उपस्थितांच्या हस्ते महात्मा गांधींच्या फोटो प्रतिमेचे पूजन करून गृहज्योती योजना फलकाचे अनावरण करण्यात आले. यावेळी हेस्कॉमचे नागेश दौलतकर, जावेद नाईकवाडी, हंचिमनी, राजू पारेकर,  कर्मचारी वर्ग, त्याचबरोबर अॅड. अरूण सरदेसाई, प्रकाश मजगावी आदी उपस्थित होते. कार्यक्रमाच्या उद्घाटनप्रसंगी हेस्कॉमच्या कल्पना तिरवीर यांनी कुणालाही न बोलावता उद्घाटन केल्याने भाजप तसेच नगारिकांतून नाराजी व्यक्त होत आहे. याबाबत अधिकाऱ्यांना विचारले असता त्यांनी यावर बोलणे टाळले.