सुवर्णविधानसौध देखभालीसाठी कायमस्वरुपी योजना राबवू

बेळगाव : येथील सुवर्णविधानसौधमध्ये डिसेंबरमध्ये विधिमंडळाचे हिवाळी अधिवेशन भरविण्यात येणार आहे. या पार्श्वभूमीवर विधानसभा अध्यक्ष यू. टी. खादर आणि विधान परिषदेचे सभापती बसवराज होरट्टी यांनी अधिवेशन पूर्वतयारी बैठक घेतली. बेंगळूर येथील विधानसौधप्रमाणेच सुवर्णविधानसौधची देखभाल करण्यात यावी, यासाठी कायमस्वरुपी योजना आखण्यासाठी चिंतन सुरू आहे, असे सभापती बसवराज होरट्टी यांनी सांगितले. प्रारंभी सुवर्णविधानसौधच्या बांधकामाची सभाध्यक्ष यू. टी. खादर यांनी पाहणी केली. त्यानंतर आवश्यक ठिकाणी हाती घ्याव्या लागणाऱ्या कामांची सूचना अधिकाऱ्यांना केली. यानंतर विधानसभा सभागृह सभाध्यक्षांचे कक्ष आदींची पाहणी केली. स्वच्छता, आसन व्यवस्था, विद्युत सोय, इंटरनेट, टीव्ही, संगणक या अधिवेशनकाळात आवश्यक असणाऱ्या मूलभूत सुविधांची माहिती घेऊन पाहणी केली. विधानसभा सभागृहात टीव्ही पडदा लावून सभाध्यक्षांच्या खुर्चीसमोर सर्व आमदारांचे नाव आणि आसन संख्या याची माहिती प्रदर्शित करण्यात यावी, यासाठी पडद्याची व्यवस्था करण्यात यावी, असे सांगितले. सेंटर हॉल परिषदचे सभागृह, सभापती कक्ष, विरोधीपक्ष विभाग, मंत्र्यांचे कॅबिनेट हॉल, ऑडिटोरियम आदी ठिकाणी भेट देऊन पाहणी केली. यावेळी जिल्हाधिकारी नितेश पाटील, पोलीस आयुक्त एस. एन. सिद्धरामप्पा, हर्षल भोयर आदी उपस्थित होते.