आयजीपी संदीप पाटील यांचा राष्ट्रपती पदकाने सन्मान

बेळगाव : बेळगावच्या जिल्हा पोलीसप्रमुखपदी कार्यरत असताना जनता दर्शन या अभिनव उपक्रमाच्या माध्यमातून पोलीस आणि सर्वसामान्य नागरिक यांच्यातील दरी कमी करून पोलीस दलाबद्दल विश्वास निर्माण करण्याचे प्रयत्न करणारे ज्येष्ठ आयपीएस अधिकारी संदीप पाटील यांना स्वातंत्र्यदिनाच्या पार्श्वभूमीवर राष्ट्रपती पदक जाहीर झाले आहे. पोलीस दलातील आदर्श सेवेसाठी त्यांना राष्ट्रपती पदक जाहीर झाले आहे. सध्या संदीप पाटील हे बेंगळूर येथे कार्यरत आहेत. 2 सप्टेंबर 2010 ते 6 जुलै 2013 पर्यंत बेळगावचे जिल्हा पोलीसप्रमुख म्हणून त्यांनी उल्लेखनीय कामगिरी केली आहे. सर्वसामान्य माणसांची कामे तातडीने व्हावीत, यासाठी त्यांनी जनता दर्शनाचा उपक्रम राबविला. संदीप पाटील यांचा जनता दर्शन संपूर्ण राज्यात एक आदर्श उपक्रम ठरला होता. दर गुरुवारी दुपारी पोलीस मुख्यालयात ते स्वत: नागरिकांची गाऱ्हाणी ऐकत होते. यावेळी जिल्ह्यातील सर्व पोलीस उपअधीक्षकांना बेळगावला यावे लागत होते. एखाद्या सर्वसामान्य नागरिकाने केलेल्या तक्रारीची त्वरित दखल घेत त्यांची कामे मार्गी लावण्यात येत होती. बेळगाव येथील कारकीर्दीत त्यांनी अनेक उपक्रम राबविले. सुवर्णविधानसौधचे उद्घाटन त्यांच्याच कारकीर्दीत झाले. बंदोबस्तावर असताना दगडफेकीत त्यांच्या डोक्याला दुखापतही झाली होती.