उदयकुमार यांच्या पत्नीचा आरोप, अठरा दिवसांपूर्वीही आत्महत्येचा प्रयत्न
बेळगाव : आर्थिक व्यवहारात फसवणूक झाल्याने गणेश मंदिरातील पुरोहिताने आत्महत्या केली आहे. मंगळवार दि. 31 डिसेंबर रोजी ही घटना घडली आहे. आपली फसवणूक सहन न झाल्याने अठरा दिवसांपूर्वीच त्याने रेल्वेखाली झोकून देऊन आत्महत्येचा प्रयत्न केला होता, अशी माहिती उघडकीस आली. उदयकुमार गुरुनाथ कुरडूर (वय 52) रा. हनुमाननगर असे त्या दुर्दैवी पुरोहिताचे नाव आहे. उदयकुमारची पत्नी ज्योती यांनी एपीएमसी पोलीस स्थानकात फिर्याद दिली असून टी. व्ही. सेंटर येथील श्रीनिवास होन्नावरकर याने आपल्या पतीची आर्थिक फसवणूक केल्यामुळे आत्महत्या करण्याची वेळ आली आहे, असे ज्योतीने आपल्या फिर्यादीत म्हटले आहे.
टी. व्ही. सेंटर परिसरातील गणेश मंदिरात पौरोहित्य करणाऱ्या उदयकुमार यांना फ्लॅट देण्याचे आमिष दाखविल्यामुळे श्रीनिवास होन्नावरकर याला त्यांनी अनेक ठिकाणाहून हातउसने घेऊन, काही ठिकाणी कर्ज काढून पैसे दिले होते. सुमारे साडेचार लाख रुपयांहून अधिक रक्कम दिली होती. एक महिन्यापूर्वी श्रीनिवास होन्नावरकरने हात वर केल्यामुळे उदयकुमार यांना धक्काच बसला होता. उपलब्ध माहितीनुसार 13 डिसेंबर रोजी सायंकाळी आपल्या घरात चिठ्ठी लिहून ठेवून आत्महत्या करण्यासाठी ते घराबाहेर पडले होते. हा प्रकार उघडकीस आल्यानंतर लगेच पत्नी ज्योती एपीएमसी पोलीस स्थानकात पोहोचल्या होत्या. पोलिसांनी उद्या दुपारपर्यंत शोधा, सापडले नाही तर आमच्याकडे परत या, असे सांगून पाठवले होते. आत्महत्या करण्याचा निर्धार करून घराबाहेर पडलेले उदयकुमार रेल्वेरूळापर्यंतही पोहोचले होते. आत्महत्येचे धाडस झाले नाही. एकुलत्या एक मुलीची आठवण झाल्यामुळे त्याच दिवशी रात्री ते घरी परतले होते.
कुटुंबीयांनी दुसऱ्या दिवशी त्यांना पोलीस स्थानकात नेले होते. त्याचवेळी श्रीनिवास होन्नावरकर याला बोलावून चौकशी केली असती तर कदाचित उदयकुमार यांच्यावर आत्महत्येची वेळ आली नसती. कुटुंबीयांनी त्यांची समजूत काढली. त्यांनी काम करत असलेल्या रेड्डी भवनमधील पदाधिकाऱ्यांनीही त्यांना धीर दिला होता. शेवटी 31 डिसेंबर रोजी विष पिऊन उदयकुमार यांनी आपले जीवन संपविले आहे. श्रीनिवास होन्नावरकर हाच आपल्या मृत्यूस जबाबदार असल्याची चिठ्ठी लिहून ठेवून त्यांनी आत्महत्या केली आहे. टी. व्ही. सेंटर येथील गणेश मंदिराचे पदाधिकारी, सदाशिवनगर येथील रेड्डी भवनचे पदाधिकारी सर्व प्रक्रिया पूर्ण होईपर्यंत तळ ठोकून होते. आता श्रीनिवास होन्नावरकरला ताब्यात घेण्यासाठी पोलिसांनी प्रयत्न सुरू केले आहेत.
