हुबळीच्या कंत्राटदाराची लॉजमध्ये आत्महत्या

बेंगळूर : हुबळीतील कंत्राटदार आणि हॉटेल व्यावसायिकाने विजयनगर जिल्ह्याच्या हुविनहडगली येथील लॉजमध्ये आत्महत्या केल्याची घटना घडली आहे. आनंद उमेश हेगडे (वय 40) असे आत्महत्या केलेल्या कंत्राटदाराचे नाव आहे. रविवारी सकाळी हुबळीहून हुविनहडगली येथे आल्यानंतर आनंदने दाक्षायणी लॉजमध्ये खोली घेतली. रात्री तेथेच त्याने गळफास घेत जीवनयात्रा संपविली. आनंदच्या आत्महत्येचे कारण अद्याप उलगडलेले नाही. आनंद हेगडे याने हुविनहडगली शहरातील तालुका क्रीडांगणाच्या नूतनीकरणाच्या कामाचे टेंडर मिळविले होते.   रविवारी येथे आल्यानंतर आनंद रात्री लॉजमध्ये वास्तव्यास गेला. सोमवारी सकाळी त्याच्या पत्नीने फोन केला. मात्र, प्रतिसाद न मिळाल्याने तिने लॉजच्या कर्मचाऱ्यांना फोन केला. कर्मचाऱ्यांनी रुमचा दरवाजा ठोठावला. दरवाजा उघडत नसल्याने त्यांनी पोलिसांना माहिती दिली. पोलिसांनी दरवाजा उघडल्यानंतर मृतदेह गळफास घेतलेल्या अवस्थेत आढळला.