गँगवाडी येथे घर कोसळून नुकसान

बेळगाव : सततच्या पावसामुळे गँगवाडी, शिवबसवनगर येथे राहते घर कोसळल्याची घटना नुकतीच घडली. बकुळा अन्वर चौगुले यांचे कौलारू घर कोसळून मोठे नुकसान झाले. त्यामुळे चौगुले कुटुंबीयांचा राहण्याचा प्रश्न निर्माण झाला आहे. मागील आठवड्यात झालेल्या जोरदार पावसामुळे शहरासह उपनगरात अनेक ठिकाणी घरे कोसळली. जुनी मातीची तसेच कौलारू घरे कोसळण्याचे सत्र सुरू होते. गँगवाडी येथे चौगुले कुटुंबीयांचे घर शुक्रवार दि. 4 जुलै रोजी अचानक कोसळले. सुदैवाने घरामध्ये कोणी नसल्याने जीवितहानी टळली. मातीच्या भिंती कोसळल्यामुळे छतदेखील एका बाजूला कलंडले. घराचे मोठ्या प्रमाणात नुकसान झाले असून चौगुले कुटुंबीयांनी नुकसानभरपाईची मागणी केली आहे. महानगर पालिकेकडे नुकसानभरपाईसाठी अर्ज दाखल करण्यात आला असून लवकरात लवकर मदत मिळावी, अशी मागणी त्यांनी केली आहे.