सदाशिवनगरात दीड लाखाची घरफोडी

बेळगाव : दुसरा क्रॉस, सदाशिवनगर येथील एका बंद घराचा कडीकोयंडा तोडून चोरट्यांनी दीड लाखाचा ऐवज पळविला आहे. रविवारी सायंकाळी चोरीचा हा प्रकार उघडकीस आला असून सोमवारी एपीएमसी पोलीस स्थानकात एफआयआर दाखल झाला आहे. कंत्राटदार शेखरगौडा मल्लनगौडा पाटील यांच्या घरात चोरी झाली आहे. शेखरगौडा व त्यांचे कुटुंबीय रविवारी कौटुंबिक कार्यक्रमासाठी गोकाकला गेले होते. सायंकाळी ते गोकाकहून परतले. त्यावेळी दरवाजा उघडा होता. त्यामुळे घरात चोरी झाल्याचे उघडकीस आले. चोरट्यांनी कडीकोयंडा तोडून तिजोरीतील 20 ग्रॅम सोन्याचे दागिने व 60 हजार रुपये रोख रक्कम असा सुमारे दीड लाखाचा ऐवज पळविला आहे. घटनेची माहिती समजताच एपीएमसीचे पोलीस निरीक्षक विश्वनाथ कब्बुरी व त्यांच्या सहकाऱ्यांनी घटनास्थळी भेट देऊन पंचनामा केला. चोरट्यांचा माग काढण्यासाठी श्वानपथक व ठसेतज्ञांना पाचारण करण्यात आले. बेळगाव शहर व उपनगरातील बंद घरांना लक्ष्य बनविण्यात येत असून दिवाळीच्या तोंडावर चोऱ्या, घरफोड्या वाढल्या आहेत. त्यामुळे नागरिक भयभीत झाले आहेत. सदाशिवनगर येथील चोरीप्रकरणी सोमवारी एफआयआर दाखल करण्यात आला आहे.