देवरुख :
शहरातील मार्लेश्वर पेट्रोल पंपसमोरील सोळजाई हॉटेलला आग लागून सुमारे दोन लाख रुपयांचे नुकसान झाले. ही घटना शनिवारी मध्यरात्री घडली. स्थानिकांचे प्रसंगावधान आणि देवरुख नगरपंचायतीचा अग्निशमन बंब यामुळे आग आटोक्यात आली. आग शॉर्टसर्किटमुळे लागल्याचा प्राथमिक अंदाज वर्तवण्यात येत आहे.
गेले दोन दिवस हॉटेल बंद होते. देवरुख-साखरपा या मुख्य मार्गालगत हे हॉटेल आहे. शनिवारी मध्यरात्री २ वाजण्याच्या सुमारास मार्गावरून प्रवास करणाऱ्या नागरिकांना हॉटेलमधून धूर तसेच आगीच्या ज्वाला दिसून आल्या.
यावेळेस दत्तनगर येथे कबड्डी स्पर्धा सुरू होती. तेथील तरुणांना याबाबतची कल्पना देताच मंडळाचे कार्यकर्ते आणि स्थानिक नागरिक तत्काळ घटनास्थळी देवरुख मदतकार्यासाठी धावून गेले. नगरपंचायतीच्या अग्निशमन बंबाला पाचारण करण्यात आले. यामुळे आग आटोक्यात आणण्यात यश आले.
मात्र, हॉटेलमध्ये असलेले जेवणाचे साहित्य, फ्रीज आगीच्या भक्ष्यस्थानी पडले. हॉटेल बंद असल्याने शिंदे यांनी सिलेंडर घरी नेले होते. यामुळे मोठा अनर्थ टळला.
