पुणे / प्रतिनिधी :
जागतिक महिला दिनाचे औचित्य साधत वित्तीय, सहकार व सामाजिक क्षेत्रातील ‘लोकमान्य मल्टिपर्पज को-ऑप सोसायटी लि’तर्फे विविध क्षेत्रात कार्य करणाऱ्या महिलांचा सन्मान करण्यात आला. ‘लोकमान्य सोसायटी’चे संस्थापक-अध्यक्ष व ‘तरुण भारत’चे सल्लागार संपादक किरण ठाकुर यांच्या हस्ते हेमा यादव (वैमनीकॉम, सहकार प्रशिक्षण), वैशाली देशमुख (बांधकाम प्रकल्प), योगिनी पोकळे (सहकारी बँकिंग), अॅड सीमंतिनी नुलकर, सातारा (सामाजिक व पर्यावरण), सरला भिरूड (संशोधक), वर्षा कोटफोडे (जतन-संवर्धन), अनघा गाडगीळ (शेती व केटरिंग), शुभांगी कोंढेकर (मुद्रण व प्रकाशन), स्वाती महाळंक (आकाशवाणी निवेदिका व समाजकार्य), शीतल पवार व प्राची कुलकर्णी (पत्रकारिता), अद्वैता उमराणीकर (शिक्षण) या मान्यवर महिलांना शाल, पुष्पगुच्छ व सन्मानपत्र देऊन गौरविण्यात आले.
सन्मानार्थींतर्फे हेमा यादव व अॅड सीमंतिनी नुलकर यांनी मनोगत व्यक्त केले. ‘लोकमान्य अर्थवार्ता’चे सल्लागार संपादक योगेश्वर गंधे यांनी या सन्मानामागची संकल्पना मांडली. ‘लोकमान्य सोसायटी’चे पुणे विभागीय प्रमुख सुशील जाधव यांनी आभार मानले. लेखिका-कवयित्री ऋतुजा फुलकर यांनी कार्यक्रमाचे सूत्रसंचालन केले. लोकमान्य सोसायटीचे पुणे सहा. क्षेत्रीय प्रबंधक हर्षद झोडगे, बुलढाणा अर्बन को-ऑप क्रेडिट सोसायटीचे मुख्य कार्यकारी अधिकारी शिरीष देशपांडे यांच्यासह सभासद, खातेदार, हितचिंतक आदी उपस्थित होते.
