मातृत्वाचा सन्मान होणे काळाची गरज : लुकास रेमेडीज

म्हापसा : स्वकष्टातून मुलांचे भवितव्य घडविणाऱ्या मातांचा सन्मान होणे काळाची गरज आहे. तिच्या सन्मानार्थ साजरा होणारा ‘मदर्स डे’ सर्वत्र साजरा व्हायला हवा, असे प्रतिपादन साळगावचे सरपंच लुकास रेमेडीज यांनी केले. साळगाव पंचायत सभागृहात आयोजित केलेल्या ‘मदर्स डे’ कार्यक्रमात ते बोलत होते. व्यासपीठावर उपसरपंच उत्कर्षा संदेश कुडणेकर, पंच रामदास कोनाडकर, अनिल पऊळेकर, दयानंद कुडणेकर, सौ. मारिया, प्रदीप पाडगांवकर, श्री कमळेश्वर हायरसेकंडरी अध्यापक विठोबा बगळी, प्रदीप सावंत आदी उपस्थित होते. सरपंच लुकास रेमेडीज पुढे म्हणाले, समाजात नि:स्वार्थी भावनेने कार्य करणाऱ्या युवकांची गरज आहे. प्रदीप सावंत यांच्यासारखे युवक आज समाजाभिमुख कार्य करीत आहेत. त्यांना प्रोत्साहन देण्याची गरज आहे, असे ते म्हणाले. पत्रकार प्रदीप पाडगांवकर म्हणाले की, आईचा महिमा अगाध आहे. पौराणिक काळातही माता आपल्या मुलांच्या कल्याणाचा ध्यास घेऊन वावरत होत्या. आईचे महात्म्य टिकवून ठेवण्याची गरज आहे. तिचा सन्मान हा समाजाचा सन्मान आहे, असे ते म्हणाले. विठोबा बगळी म्हणाले, गोव्यात प्रथमच साळगावसारख्या पंचायतीत ‘मदर्स डे’ साजरा होतो, ही समाधानाची बाब आहे. ज्येष्ठांना सन्मानाबरोबर मुलांच्या आधाराची गरज असते. वडिलधाऱ्यांचा सन्मान त्यांच्या जिवंतपणीच करा, असे त्यांनी सांगितले. यावेळी माता-भगिनींच्याहस्ते केक कापून मदर्स डे साजरा करण्यात आला. प्रारंभी सौ. गावडे, सौ. कुंदा यांनी मान्यवरांना पुष्प देऊन स्वागत केले. याप्रसंगी निवडक मातांना प्रत्येकी रु. एक हजार देऊन मान्यवरांच्याहस्ते सन्मानित करण्यात आले. प्रदीप सावंत यांनी सूत्रसंचालन व आभारप्रकटन केले. साळगाव येथे प्रदीप सावंत यांनी पंचायतीच्या सहकार्याने साळगाव येथे मदर्स डे साजरा करण्यात आला.