बेघर वृद्धाची निराधार केंद्रात रवानगी

बेळगाव : कुटुंबीयांपासून बेघर झालेल्या एका असाहाय्य वृद्धाची समाज सेविका माधुरी जाधव यांच्यासह सामाजिक कार्यकर्त्यांच्या मदतीने निराधार केंद्रात रवानगी करण्यात आली. रमेश देशपांडे (वय 77) असे त्या वृद्धाचे नाव आहे. देशपांडे हे गेल्या चार ते पाच दिवसांपासून शिवाजी कॉलनीत भटकत होते. सदर बाब येथील सामाजिक कार्यकर्ते पवन कांबळे, संतोष दळवी, विक्रम कदम, विनय खांडेकर याच्या लक्षात आली.  त्यांनी देशपांडे यांची भेट घेऊन चौकशी केली. यावेळी त्यांनी आपल्याला दोन मुले असून, त्यांचा ठावठिकाणाची माहिती नाही. काही दिवसांपूर्वी लहान मुलगा आपल्याला हिंडाल्कोजवळ सोडून गेला. तेव्हापासून आपण येथे राहात आहे. यानंतर सामाजिक कार्यकर्त्यांने देशपांडे राहात असलेल्या ठिकाणीही चौकशी केली. पण, त्यांच्या पुंटुंबीयाचा संपर्क होऊ शकला नाही. यामुळे त्यांनी स्वखर्चातून देशपांडेंची व्यवस्था केली. यापुढे त्यांची योग्य व्यवस्था होण्याच्या उद्देशान समाज सेविका माधुरी जाधव यांना कार्यकर्त्यांनी देशपांडे यांची माहिती दिली. माहिती मिळताच माधुरी जाधव यांनी जुनेबेळगाव येथील निराधार केंद्राचे व्यवस्थापक रावसाहेब शिरहट्टी यांच्याशी संपर्क साधून देशपांडे यांची निराधार केंद्रात रवानगी केली. तसेच शहापूर पोलीस स्थानकात तक्रार दाखल केली आहे.