आशियाई स्पर्धेतून हिमा दास बाहेर

भुवनेश्वर : येत्या सप्टेंबर-ऑक्टोबर दरम्यान चीनमधील हांगझोयु येथे होणाऱ्या आशियाई क्रीडा स्पर्धेतून भारताची अव्वल महिला धावपटू हिमा दासला दुखापतीमुळे बाहेर पडावे लागत आहे. गेल्या एप्रिल महिन्यात हिमा दासला सदर दुखापत झाली होती आणि ती अद्याप पूर्णपणे बरी झाली नसल्याने ती आशियाई क्रीडा स्पर्धेत सहभागी होऊ शकणार नाही, अशी माहिती प्रमुख प्रशिक्षक राधाकृष्ण नायर यांनी दिली. 2018 च्या जकार्ता आशियाई क्रीडा स्पर्धेत 23 वर्षीय हिमादासने महिलांच्या 400 मी. धावण्याच्या शयंतीत रौप्यपदक पटकावले होते. तसेच तिने या स्पर्धेत सुवर्णपदक मिळवणाऱ्या महिलांच्या रिले संघाचे प्रतिनिधीत्व केले होते. 15 एप्रिल रोजी बेंगळूरमध्ये हिमा दासला ही स्नायू दुखापत झाली होती. सध्या तिच्यावर वैद्यकीय उपचार चालू असून तिला या दूखापतीतून पूर्णपणे बरे होण्यासाठी काही दिवस लागतील. गेल्या महिन्यात रांची येथे झालेल्या फेडरेशन चषक अॅथलेटिक्स स्पर्धेत हिमा दास सहभागी झाली नव्हती.