जत :
करजगी अत्याचार प्रकरणाचा खटला जलदगती न्यायालयात चालवून आरोपीला कठोर शिक्षा व्हावी यासाठी प्रयत्न करणार असल्याचे प्रतिपादन पालकमंत्री चंद्रकांत पाटील यांनी केले. कुटुंबास मनोधैर्य योजनेतून आर्थिक मदत देण्याची ग्वाही त्यांनी दिली. सोमवारी करजगी येथे त्यांनी पा†डतेच्या कुटुंबीयांची भेट घेऊन सांत्वन केले. आमदार गोपीचंद पडळकर, जिल्हाधिकारी डॉ. राजा दयानिधी, मुख्य कार्यकारी अधिकारी तृप्ती धोडमिसे, पोलीस अधिक्षक संदीप घुगे, बाळासाहेब यादव, अमृतानंद स्वामी, डॉ. रवींद्र आरळी आदी उपस्थित होते.
मंत्री पाटील म्हणाले, करजगी येथील घटना दुर्देवी व माणुसकीला काळिमा फासणारी आहे. यामध्ये पोलिसांनी तातडीने आरोपीला अटक केली. याप्रकरणी दोषारोपपत्र दाखल करून आरोपीला लवकरात लवकर कठोर शिक्षा व्हावी, यासाठी हा खटला जलदगती न्यायालयात चालविण्यासाठी जिल्हा प्रशासनाने कार्यवाही करावी. मनोधैर्य योजनेतून पीडितेच्या कुटुंबियांना सत्वर आर्थिक मदत देण्यात येईल. मुख्यमंत्री सहायता निधीतून आर्थिक मदत करण्यासाठी प्रयत्न करण्याची ग्वाही त्यांनी दिली.
