दाबोळी, वास्कोत जोरदार पाऊस

पणजी : दाबोळी आणि वास्को या दोन केंद्रावर गेल्या 24 तासात विशेषत: मंगळवारी पहाटे जोरदार पाऊस आला, तर पणजीमध्ये सकाळी किंचित पावसाचा शिडकावा झाला. पुढील सहा दिवस गोव्यात पाऊस पडत राहील, असा अंदाज हवामान खात्याने दिला आहे. मंगळवारी सकाळी राज्यात ढगाळ हवामान होते. पहाटे मेघगर्जना झाल्या, मात्र प्रत्यक्षात पाऊस पडला तो काणंकोण, दाबोळी वास्को अशा तीन ठिकाणी. दाबोळी केंद्रावर 19 मिलिमीटर, तर मुरगाव केंद्रावर एक इंचापेक्षा जास्त पाऊस झाला. हवामान खात्याने दुपारी जारी केलेल्या माहितीनुसार दि. 13, 14 आणि 15 मे असे तीन दिवस जोरदार पाऊस पडेल आणि त्याकरिता येलो अलर्ट जारी केला आहे. त्यानंतर दि. 16, 17, 18 आणि 19 मे असे चार दिवस गोव्यात सर्वत्र पाऊस पडेल, परंतु तो हलक्या प्रमाणात राहील असे म्हटले आहे. राज्यात ढगाळ हवामान असल्यामुळे उकडा प्रचंड वाढलेला आहे. त्यामुळे नागरिक पावसाची चातकाप्रमाणे वाट पाहत आहेत. काळे ढग येतात आणि ते व्रायाने पुढे जातात, प्रत्यक्षात पाऊस पडत नाही. मंगळवारी रात्री उशिरा गोव्याच्या काही भागात मेघगर्जनेसह हलक्या स्वरूपात पाऊस पडला. आज व उद्या गोव्यात सर्वत्र जोरदार पाऊस पडण्याची शक्यता हवामान खात्याने व्यक्त केली आहे.