कोल्हापूर :
राज्याचा गृहमंत्री कोण याबाबत राज्यभर चर्चा सुरू असतानाच, पोलीस अधीक्षक महेंद्र पंडित यांनी जिह्यातील चार पोलीस ठाण्याच्या प्रभारी पोलीस अधिकाऱ्यांच्या नियंत्रण कक्षात शनिवारी तडकाफडकी बदल्या केल्या. त्याच्या जागी नियंत्रण कक्ष आणि स्थानिक गुन्हे अन्वेषण शाखेतील पोलीस अधिकाऱ्यांच्या नियुक्ती करण्यात आल्या. नियुक्त केलेल्या पोलीस अधिकाऱ्यांना तत्काळ बदली झालेल्या पोलीस ठाण्याचा प्रभार स्विकारण्याबाबत सक्त आदेश देण्यात आल्याची माहिती सुत्रानी दिली.
बदली झालेल्यांमध्ये कोल्हापूर शहरातील शाहूपुरी पोलीस ठाण्याचे पोलीस निरीक्षक अजयकुमार सिकंदर, लक्ष्मीपुरी पोलीस ठाण्याचे पोलीस निरीक्षक दिलीप पवार, गडहिंग्लज पोलीस ठाण्याचे पोलीस निरीक्षक सतिश होडगर आणि गांधीनगर पोलीस ठाण्याचे सहाय्यक पोलीस निरीक्षक दिपक जाधव या अधिकाऱ्यांच्या नावाचा समावेश आहे. तर नियंत्रण कक्षातील पोलीस निरीक्षक संतोष डोके यांची शाहुपूरी पोलीस ठाण्याचे पोलीस निरीक्षक म्हणून श्रीराम कणेरकर यांची लक्ष्मीपुरी पोलीस ठाण्याच्या पोलीस निरीक्षकपदी, तर कोल्हापूर स्थानिक गुन्हे अन्वेषण शाखेतील सहाय्यक पोलीस निरीक्षक सागर वाघ यांची गांधीनगर पोलीस ठाण्याचे प्रभारी पोलीस अधिकारी म्हणून नियुक्ती करण्यात आली. या तिन्ही पोलीस अधिकाऱ्यांनी त्वरीत नियुक्ती झालेल्या पोलीस ठाण्याचा प्रभारी पोलीस अधिकारी म्हणून पदभार सुध्दा स्विकारला आहे. रात्री उशिरापर्यत गडहिंग्लज पोलीस ठाण्याचे प्रभारी पोलीस अधिकारी म्हणून कोणत्या पोलीस अधिकाऱ्याची नियुक्ती केली यांची माहिती समजू शकली नाही.
